Qazaqstannyń dopingke qarsy ulttyq ortalyǵy analizderinen tyiym salynǵan zattar tabylǵany úshin diskvalifikatsiialanǵan sportshylardyń tizimin jariialady, dep habarlaidy Sputnik agenttigi.
Qazaqstandyq biatlonshy Kristina Borovikovanyń analizinen tyiym salynǵan preparat shyqqqan.
Borovikova doping-synamany Qazaqstannyń jastar chempionatynda 25-shi oryndy ielengen kezde, 2018 jyldyń 26 jeltoqsanynda tapsyrdy. Sportshynyń qanynan meldonii tabyldy.
Borovikova tórt jylǵa – 2019 jyldyń 25 qańtarynan 2023 jyldyń 25 qańtaryna deiin jarystardan shettetildi.
Kristina Borovikova 2001 jyly Shyǵys Qazaqstan oblysynyń Ridder qalasynda týǵan.
2016 jyly WADA Aqmola oblysynan shyqqan sportshy Igor Krivorchýkti analizderinen meldonii tabylýyna bailanysty tórt jylǵa shettetken edi. 2017 jyly Aziia chempionatynyń, Ýniversiada men Aziadanyń kúmis júldegeri Anna Kistanova fýrosemid úshin eki jylǵa diskvalifikatsiialandy. Osydan keiin Kistanova karerasyn aiaqtady.
Meldoniige nege tyiym salynǵan?
Meldonii aǵzadaǵy otteginiń sińýin jeńildetedi, sergitedi jáne júrek jasýshalaryn ártúrli jaǵymsyz áserlerden qorǵaidy. Preparat jumys ónimdiligin arttyrady, psihikalyq jáne fizikalyq artyq kúsh jumsaý belgilerin azaitady, tózimdilikti arttyrýǵa kómektesedi, ońaltýdy jedeldetedi.
2016 jyldyń 1 qańtarynan bastap Dúniejúzilik dopingke qarsy agenttik (WADA) meldoniidi tyiym salynǵan preparattar tizimine engizdi, ony sportshylarǵa jarys kezinde de, odan tys ýaqytta da paidalanýǵa bolmaidy.
