«Astana Opera» jetekshi solisi Áigerim Beketaeva TMD-nyń «Debiýtter dostastyǵy» jastar syilyǵynyń laýreaty atandy. Bul týraly "Ult aqparat" atalǵan uiymnyń baspasóz qyzmetine silteme jasap habarlaidy.
Syilyqqa Qazaqstan, Resei, Ázerbaijan, Armeniia, Belarýs, Qyrǵyzstan, Moldova, Tájikstannan 26 nominant usynyldy. Shyǵarmashylyq jetistikteri ónerdiń ár salasyn damytý men dáripteýde eleýli úles bolǵan Dostastyq elderiniń segiz mádeniet qairatkeri halyqaralyq qazylardyń sheshimimen syilyqtyń laýreaty atandy. Syilyq TMD-da Mádeniet jyly dep jariialanǵan 2018 jyldyń qorytyndysy boiynsha berildi.
«Osy syilyqtyń quryltaishylaryna maǵan bildirgen senimderi men shyǵarmashylyǵyma bergen joǵary baǵalary úshin alǵysymdy bildiremin. Ártis úshin árbir sahnaǵa shyǵý – úlken baqyt, kórermenderdi qýantý, oryndaýshylyq sheberliktiń jańa qyrlaryn ashý múmkindigi. Mundai marapattar bizdi jańa belesterdi baǵyndyrýǵa shabyttandyrady», - dep atap ótti Áigerim Beketaeva.
«Debiýtter dostastyǵy» halyqaralyq syilyǵy Táýelsiz Memleketter Dostastyǵyna qatysýshy memleketterdiń Gýmanitarlyq yntymaqtastyq jónindegi keńesi jáne Halyqaralyq gýmanitarlyq yntymaqtastyq qorymen 2008 jyly qurylǵan bolatyn. Quryltaishylarmen anyqtalatyn gýmanitarlyq salalardaǵy atalmysh syilyq jyl saiyn jas mamandarǵa (35 jasqa deiin) tabystalady. Syilyq berile bastaǵan jyldardyń ishinde ony aqyndar, dárigerler, ustazdar, ǵalymdar, tarih jáne mádeniet eskertkishterin qorǵaý jónindegi mamandar, sportshylar men jattyqtyrýshylar, týrizmdi uiymdastyrýshylar ielengen.
2019 jylǵy TMD-nyń mádeni astanasy Bresttegi saltanatty rásim jyl boiyndaǵy is-sharalar baǵdarlamasyn túiindeidi. Osy keshte Shymkent qalasy qurmetti mártebe estafetasyn qabyldap, 2020 jyly Dostastyqtyń mádeni astanasyna ainalmaq.
Marapattaý rásimi búgin Belarýstegi Brest akademiialyq drama teatrynda ótedi.
