Foto: ashyq derekkóz
Jambyl oblysynyń turǵyny ózi bilmei 34 jyl boiy nekede turǵanyn kezdeisoq anyqtap, sotqa júginýge májbúr boldy, dep habarlaidy Ult.kz.
Is materialdaryna sáikes, er adam 1991 jyly bir qyzben kezdesip júrgen. Jas jup otbasy qurýdy josparlaǵanymen, arada tórt ai ótken soń qarym-qatynastary úzilip, ekeýi eki jaqqa ketken. Olar AHAT organdaryna baryp, nekeni resmi tirkemegen, eshqandai qujatqa qol qoimaǵan jáne neke týraly kýálik almaǵan.
Keiin árqaisysy óz ómirin jalǵastyrǵan: áiel adam 1994 jyly basqa azamatpen zańdy nekege tursa, er adam 2021 jyly shańyraq kótergen.
Alaida 2025 jyly er adam banktik qosymshanyń «Memlekettik qyzmetter» bólimin paidalaný barysynda 1991 jyly tirkelgen neke týraly aqparatty baiqap qalǵan. Osydan keiin ol bul nekeni jaramsyz dep taný úshin sotqa talap-aryz bergen.
Sot barysynda anyqtalǵandai, nekeni tirkeý aktisindegi qoltańbalar talapkerge de, jaýapkerge de tiesili emes, olardy úshinshi tulǵa qoiǵan. Sonymen qatar sol jyldarǵa tiesili azamattyq hal aktilerin tirkeý kitaby saqtaý merziminiń ótýine bailanysty joiylǵany belgili boldy.
Sotta talapkerdiń jaqyn dosy ári kórshisi kýá retinde jaýap berip, olardyń neke tirkeý rásimine qatyspaǵanyn jáne eshqandai qujatqa qol qoimaǵanyn rastady. Al AHAT organynyń ókili úshinshi tulǵa retinde shaqyrylǵanymen, sot otyrysyna kelmegen.
Nátijesinde sot 1991 jyly neke tirkeý zań talaptaryn óreskel buza otyryp júrgizilgen degen qorytyndyǵa keldi. Atap aitqanda, taraptar tirkeý kezinde jeke qatyspaǵan, al mundai «qashyqtan neke» zańnamada kózdelmegen. Osyǵan bailanysty nekeni tirkeý týraly akt jazbasy jaramsyz dep tanyldy.
