Qazaqstandyq sportshylar Meksikanyń Leon qalasynda aýyr atletikadan jasóspirimder arasynda ótip jatqan álem chempionatynda taǵy eki altyn medal jeńip aldy, dep habarlaidy QazAqparat.
Qazaqstan aýyr atletika federatsiiasynan málim etkendei, elordalyq 17 jastaǵy Edige Emberdi 73 kelige deiingi salmaqta úzdik shyqty.
Julqa kóterýden 134 kelini eńsergen Edige birden alǵa ketti. Al serpe kóterýden 172 kelini baǵyndyryp, álemdik rekord jasady. Qossaiys qorytyndysynda qalǵan atletterden qara úzip ketti – 306 kg.
Ózbekstandyq Diorbek Ermatov 290 kelimen (133+157) ekinshi, kanadalyq Braian Ibanez Gerrero 288 kelimen (132+156) úshinshi orynǵa kóterildi.
Taǵy bir qazaqstandyq Denis Polýboiarinov 81 kelige deiingi salmaqta chempion atandy. Ol qossaiys qorytyndysynda 323 kg (143+180) nátije kórsetti. Italiialyq Iakopo Falsinotti 293 kelimen (132+161) kúmis, meksikalyq Iaan Barreras 280 kelimen (119+161) qola júldeni qanaǵat tutty.
Osylaisha, Qazaqstan quramasy altyn medal sanyn úshke jetkizdi.
