Foto: QR Qorǵanys ministrligi
Qazaqstan Qarýly Kúshteriniń áskeri qyzmetshileri qysqy dalalyq kiimniń jańa úlgisin resmi túrde qabyldady. Bul ózgeris 2023 jylǵy mamyr aiynda ótken búkilarmiialyq keńeste talqylanyp, QR Prezidentiniń 2023 jylǵy 12 jeltoqsandaǵy Jarlyǵy aiasynda júzege asyryla bastady, dep habarlaidy Ult.kz.
Qarýly kúshterdiń Tyl basshysynyń orynbasary, polkovnik Áset Orazalinniń aitýynsha, erekshe jaǵdailar týyndaǵan kezde basqa áskerler Qarýly Kúshterge baǵynady. Sol sebepti, klimattyq erekshelikterdi eskeretin jáne jasyrý qasieti bar birkelki forma qajettigi týyndady. MultiCam úlgisin tańdaý álemdik tájiribeler negizinde jasaldy, bul túster ósimdikter, qala qurylysy, shóldi, tasty jerlerde joǵary jasyrý múmkindigin qamtamasyz etedi.
Kiimniń erekshelikteri men artyqshylyqtary
Jańa kiim úlgileri qyzmetke yńǵaily bolýymen erekshelenedi. Moiyndy aýa raiynan qorǵaý úshin pishimi jetildirilgen, al keýde qaltalarynyń kólbeý ornalasýy qujattardy saqtaýǵa yńǵaily etedi. Kiimniń shalbar beldigi denege jaqsy sáikes keledi, al retteletin elementteri pishinge úilesimdilik beredi.
Qysqy kiim úlgisinde materialdyń sý, aiaz jáne jelge tózimdiligi kúsheitilgen. Sonymen qatar, jańa úlgide jyly toqylǵan qalpaq pen júnnen jasalǵan sharf qarastyrylǵan. Maýsymdyq plashtyń ornyna kýrtka qosyldy, al kúndelikti jempir ornyna dalalyq jempir beriletin boldy. Jazǵy etikterdiń túsi qaradan qum túske aýystyrylyp, basqarý organdarynyń áskeri qyzmetshileri úshin biik qonyshty etik taktikalyq krossovkalarǵa aýystyryldy.
Ekonomikalyq tiimdiligi
Bul ózgeris kiim-keshek shyǵyndaryn qysqartý esebinen júzege asyrylýda. Ońtailandyrý nátijesinde jyl saiynǵy qajettilik 140 mln teńgege qysqardy. Qoimalardaǵy burynǵy kiimder merzimdi qyzmettegi sarbazdar men áskeri mindettilerge jumys kiimi retinde qoldanylyp, jyl saiyn 400 mln teńge kóleminde qarajat únemdeýge múmkindik bermek.
Áskeri kiim-keshek tek qazaqstandyq kásiporyndarda jasalyp, otandyq óndirýshilerdi qoldaýǵa baǵyttalady.
