«X Factor Qazaqstan» jobasynyń jeńimpazy Dariia Ǵabdýl «Arystan Patsha»/«Korol Lev» kinotýyndysynda Beionseniń daýysyn saldy, dep habarlaidy QazAqparat tilshisi.
Animatsiialyq klassikanyń kinonusqasy Qazaqstanda qazaq tilinde de shyqty. Filmge saýndtrekterdi álemge áigili oryndaýshy Beionse oryndasa, qazaq dýbliajynda estradalyq ánshi Dariia Ǵabdýl shyrqady.
Bul - Dariianyń ekinshi qadamy.
2012 jyly ol «Batyl júrek» filminiń kastingine qatysyp, synaqtan ótpei qalǵan.
«Bunyń jaqsy tustary da bar. Ol kezde dýbliajdaý degen qandai kúrdeli úderis ekendigin túsinbeppin. Stýdiiadaǵy barlyq jumys bir saǵatqa sozyldy. Meniń aldyma 60 minýt ishinde eki saýndtrekti oryndaý mindetin qoidy - bul ońai sharýa emes. Ekranda kórinisti emotsionaldy, intonatsiiamen, daýys boiaýlarymen aiaqtaý óte qiyn», - dedi ánshi.
Dariia – Beionse shyǵarmashylyǵynyń jankúieri.
«X Factor Qazaqstan» tyńdaýynda ol ánshiniń repertýarynan án shyrqady.
«Meniń oiymsha, Beionse eń úzdik oryndaýshylardyń biri, sońǵy jyldardaǵy mýzykalyq álemde negizgi figýra. Onyń án oryndaý máneri tehnikalyq jaǵynan eń kúrdelilerdiń biri sanalady. Beionseniń ánin qaitalap aitý qiynnyń qiyny. Maǵan qajetti ýaqytta kerekti jerden tabylý baqyty buiyrdy. Beionseni dál meniń dýbliajdaýym – men úshin baqyt», - dedi ol.
Film BI Group kompaniiasynyń demeýshilik qoldaýymen «Bolashaq» korporativtik qory men «Meloman» kompaniiasynyń «Ózińnen basta» jobasy aiasynda qazaq tiline dýbliajdalǵan bolatyn.
«Ózińnen basta» jobasy - kommertsiialyq maqsattardy kózdemeitin áleýmettik joba, jeke qazaqstandyq kompaniialar men metsenattardyń demeýshilik qoldaýymen júzege asyrylady. 9 jyl ishinde qazaq tiline 31 Gollivýd kinotýyndy dýbliajdaldy. Jyl sońyna deiin taǵy eki film - «Malefisenta» jáne «Muzdy ólke 2»/«Holodnoe serdtse 2» filmderiniń keiipkerleri qazaq tilinde sóileitin bolady, al kelesi jyly qazaq tiline «Walt Disney Pictures», «Pixar» jáne «Sony Pictures» stýdiialarynyń taǵy 7 filmi dýbliajdaý josparlanǵan.
«Walt Disney Pictures» daýystyq bazasyna 100-den astam qazaqstandyq akterdiń daýsy engen. Qazaq tili Blu-Ray-de kórýge bolatyn Gollivýd filmderiniń 7 negizgi tilderiniń qataryna kirdi.
