Qazaqstan alpinisteri Tian-Shan taýynda joǵalǵan áriptesterin izdeýge attanbaq, dep habarlaidy "Ult aqparat" QR IIM Tótenshe jaǵdailar komitetiniń baspasóz qyzmetine silteme jasap.
Vedomstvo málimetinshe, búgin saǵat 13-20-da Almaty oblysyndaǵy Qarqara bazalyq lagerine biliktiligi joǵary 3 qazaqstandyq alpinisten turatyn top jetken. Alpinisterdi Qyrǵyz Respýblikasyna jetkizý úshin QR IIM Tótenshe jaǵdailar komiteti Qazaviaqutqarý mekemesiniń MI-171 tikushaǵy daiyn tur.
«Qazaqstandyq alpinisterdiń qutqarý operatsiiasy aýa raiy jaqsarǵannan keiin bastalady. Qazirgi ýaqytta Tian-shan taýynyń tómengi baýraiynda jańbyr jaýyp, biik betkeilerinde qar túsip jatyr. Sonymen qatar birlesken izdeý jumystaryn júrgizý úshin qyrǵyz alpinister toby da daiyn», - dep atap ótedi komitetten.
Buǵan deiin, QR Syrtqy ister ministrliginiń resmi ókili Aibek Smadiiarov Qyrǵyzstan taýlarynda qiyn jaǵdaiǵa tap bolǵan Qazaqstan alpinisteri týraly aitqan bolatyn.
