Qazaqstandyq 40 oqýshy Halyqaralyq Aziia-Tynyq muhity matematikalyq olimpiadasynda júldeli oryndarǵa ie boldy. Elimizdiń ulttyq quramasynyń qorjynynda 5 altyn, 13 kúmis jáne 22 qola medal bar, dep habarlaidy "Ult aqparat" BǴM baspasóz qyzmetine silteme jasap.
Nur-Sultan, Almaty, Qostanai jáne Qaraǵandy qalalarynyń oqýshylary altyn medal jeńip aldy. Sonymen qatar olimpiadada Aqtaý, Atyraý, Qyzylorda jáne Pavlodar mektepteriniń oqýshylary da úzdikterdiń qatarynan kórindi. Olimpiada jeńimpazdary halyqaralyq IMO olimpiadasyna qatysý úshin Qazaqstan quramasyna kirý múmkindigine ie bolady.
Ziiatkerlik saiysqa álemniń 38 elinen júzdegen mektep oqýshysy qatysty. Olardyń qatarynda Japoniia, Aýstraliia, Kanada, Singapýr, AQSh, Argentina, Gonkong, Indoneziia, Malaiziia, Meksika, Katar, Koreia, Túrkiia jáne t.b. elder bar.
«Biyl halyqaralyq olimpiada oflain formatta ótti. Qazaqstan atynan elimizdiń túkpir-túkpirinen 131 oqýshy qatysty. Biyl bizdiń oqýshylar úzdik nátije kórsetkenin aita ketken jón. Mysaly, byltyr qazaqstandyq oqýshylar 3 altyn alsa, biyl olardyń sany 5-ke jetti. Aziia-Tynyq muhity elderiniń matematikalyq olimpiadasyndaǵy jeńisi oqýshylarymyzǵa ulttyq qurama qataryna qosylyp, IMO-da respýblika namysyn qorǵaýǵa múmkindik beredi. Balalar Qazaqstandy halyqaralyq arenada laiyqty tanyta alýy úshin biz el ishinde túrli deńgeide olimpiadalar ótkizemiz. Olimpiadada jeńister ádil jáne adal bolýy úshin ony elektrondy formatqa aýystyrdyq, odan bólek kameralar satyp aldyq. Byltyr oqýshylarymyz iri halyqaralyq olimpiadalarda rekordtyq kórsetkishke qol jetkizip, el qorjynyna 26 medal ákeldi», - dep aitty «Daryn» respýblikalyq ǵylymi-praktikalyq ortalyǵynyń direktory Timýr Nurkeshov.
Aita keteiik, Halyqaralyq Aziia-Tynyq muhity matematikalyq olimpiadasy jarysqa qatysýshylar eliniń aýmaǵynda oflain formatta ótti. Sondai-aq oqýshylar halyqaralyq olimpiadany uiymdastyrý komitetinen bir ýaqytta tapsyrmalar aldy.
