Qazaqstan Biatlonshylar odaǵynyń sheshimimen Avstriiada ótip jatqan oqý-jattyǵý jiyndarynda sporttyq rejim men tártipti buzǵany úshin qazaqstandyq tórt sportshy Ulttyq qurama sapynan shettetildi, dep habarlaidy pavlodarnews.kz saity.
QR Ulttyq Olimpiadalyq komitetiniń málimetinshe, Qazaqstan Biatlonshylar odaǵynyń prezidenti Ermek Qizatovtyń jetekshiligimen Odaqtyń tártiptik komissiiasynyń kezekten tys jiyny ótken. Atalǵan jiynǵa QR Mádeniet jáne sport ministrligi, sondai-aq Qazaqstan Ulttyq Olimpiadalyq komitetiniń ókilderi qatysty.
«Komissiia Qazaqstan ulttyq quramasynyń sapynan tórt sportshyny shettetti. Olar biatlonnan ótetin respýblikalyq jáne halyqaralyq jarystarǵa qatystyrylmaidy. Atap aitar bolsaq, Anton Pantov - tórt jylǵa, Timýr Kýts, Vladislav Vitenko jáne Roman Eremin bir jylǵa sporttan shettetildi. Sportshylardyń barlyǵy jattyǵý jiynynan qaitarylǵan. Sheshimdi qabyldaýǵa biatlonnan ulttyq qurama bas bapkeri Maqsat Sharanovtyń raporty jáne sportshylar men bapkerlerdiń túsiniktemesi sebep boldy. Sondai-aq, Obertillah qalasyndaǵy oqý-jattyǵý jiyny kezinde komanda músheleri turaqtaǵan avstriialyq qonaqúidiń aryz-shaǵymy da nazardan tys qalǵan joq», - dedi QR UO komitetinen.
Shettetilgenderdiń qatarynda pavlodarlyq Anton Pantov pen Timýr Kýts bar. Respýblikalyq buqaralyq aqparat quraldarynda sportshylardyń oqý-jattyǵý kezinde turaqtaǵan qonaqúide alkogoldik ishimdik iship, jihazdardy syndyryp, tártip buzǵandary jazyldy.
Anton Pantov pavlodarnews.kz tilshisine bergen suhbatynda oqiǵanyń mán-jaiyn aityp bergen.
«Biz jatqan bólme las boldy. Ol qonaqúide bólmelerdi tazalap turmaitynyn biz bilgen joqpyz. Túngi ýaqytta meniń qusqym keldi. Óitkeni taý klimaty maǵan aýyr tidi. Tańerteń ózimiz jinastyraiyq dep quraldar suratqan edik, jinastyrýshy kirip, bizdi otyrys uiymdastyrǵan dep kináláp, shaǵymdandy. Bólmede alkogol bolǵan joq. Ol týraly aqparat bireýdiń túsiniktemesinen shyqty. Jihazdyń synǵany týraly shaǵymnan ózimiz alǵash estidik. Komissiianyń otyrysyna bizdi bir-birlep shaqyrdy. Onsha tyńdaǵylary da kelmedi. Meni jalǵan sóilep tursyń dedi», - dedi Anton Pantov.
Anton Pantov nelikten ol ǵana 4 jylǵa shettetilgenine de toqtaldy.
«2 jyl buryn men alkogol paidalanǵan oqiǵa bolǵan. Ol kezde eskertý jasaldy. Sony negizge alyp, meni 4 jylǵa shettetip otyr. Qazirgi ýaqytta úiimdemin. Komissiianyń resmi qaǵazyn kútýdemiz. Qolymyzǵa tigen kezde ári qarai ne isteitinimizdi josparlaimyz. Qazir ornymyzǵa jastar óner kórsetip júr. Olarǵa senim artamyn», - dedi biatlonshy.
Eske salaiyq, Anton Pantov buǵan deiin doping daýyna iligip,2018 jyldyń 21 qarashasynda taǵylǵan aiyp, 2019 jyldyń 24 maýsymynda alynǵan bolatyn. A. Pantov QR halyqaralyq dárejedegi sport sheberi, 2014 jylǵy Olimpiadanyń qatysýshysy. 2008 jyldan beri halyqaralyq dodalardy baq synap keledi. Jastar arasyndaǵy álem chempionatyna 5 ret qatysqan. Aziia chempionatynyń kúmis júldegeri.
Birneshe jyldan beri halyqaralyq deńgeide jarys jolyna shyǵyp júrgen Timýr Kýts biylǵy maýsymda Álem kýboginde jáne ekinshi deńgeili IBU (halyqaralyq biatlonshylar odaǵy) kýboginde synǵa túsip júrgen. Ol Avstriiadaǵy IBU kýboginiń 3-kezeńinde jekelei jarysta eń jaqsy nátijesin kórsetip, 30-orynǵa turaqtaǵan.
