Indýstriia jáne infraqurylymdyq damý ministrligi ókili jol sapasy nashar óńirlerdi atady, - dep habarlaidy Tengrinews.kz.
Úkimet otyrysynda indýstriia jáne infraqurylymdyq damý ministri Qaiyrbek Óskenbaev joldardy tekserýdiń qorytyndysyn aitty.
"Biyl jergilikti mańyzy bar joldardyń sapasyn baqylaý barysynda 9 myńǵa jýyq synama alyndy, onyń 2,5 myńy, iaǵni 28 paiyzy talapqa sai emes", - dedi Óskenbaev.
Vedomstvo baspasóz qyzmeti jol sapasy boiynsha talapqa sai kelmeitin óńirlerdi atady:
- Shymkent - 71 paiyz;
- Mańǵystaý oblysy - 61 paiyz;
- Almaty - 56 paiyz;
- Shyǵys Qazaqstan oblysy - 49 paiyz;
- Batys Qazaqstan oblysy - 43;
- Túrkistan - 40 paiyz.
"Eskertýlerge qaramastan, tapsyrys berýshiler nysandardy paidalanýǵa qabyldap jatyr. Keibir óńirde mundai derekter boiynsha qylmystyq ister qozǵaldy", - dedi ministr.
Baspasóz qyzmeti ókilderi Aqtóbe oblysy boiynsha Ekonomikalyq tergeý departamenti Sapa ortalyǵynyń eskertýlerinen keiin jumysty sapasyz oryndaý jáne qabyldaý deregi boiynsha, Shymkentte Sybailas jemqorlyqqa qarsy is-qimyl agenttigi aktilerge jalǵan qol qoiý deregi boiynsha is qozǵaǵan.
Óskenbaevtyń aitýynsha, qarjyny bólý máselesi daýly. Kei óńir bul talaptardy oryndamaidy.
"Memleket basshysynyń tapsyrmasyna qaramastan, Batys Qazaqstan oblysynda jol jaǵdaiy tómen. Byltyr jyl aiaǵynda oblystaǵy joldardyń normativtik jaǵdaiy 39 paiyz bolsa, ortasha respýblikalyq kórsetkishi 80 paiyz bolǵan. BQO ákimdigi biyl 2,6 milliard teńge bóldi, bul jalpy biýdjettiń 10 paiyzy, al qajet qarjynyń 30 paiyzy", - dep tolyqtyrdy ministr.
