Dárilik zattar men meditsinalyq buiymdardy saraptaý ulttyq ortalyǵynyń bas direktory Arnur Nurtaev elimizdegi vaktsina sapasyna qatysty pikirlerge jaýap berdi, – dep habarlaidy «Ult aqparat».
«Bizdiń memlekettik reestrde vaktsinanyń 64 ataýy tirkelgen. Olar eń aldymen Belgiia, Frantsiia, Niderlandy syndy Eýropa elderinde jáne AQSh, Resei, Qytai, Úndistan, Koreia, Izrailde óndirilgen. Sapasyna kelsek, vaktsinalardy tirkeýge alarda eki deńgeili tekserýden ótkizemiz. Birinshi kezeńde - tirkeýge kelip túsken barlyq qujattarǵa saraptama júrgiziledi. Ekinshi kezeńde - qujattary tekserilgen árbir vaktsinaǵa zerthanalyq taldaý jasalady. Zerthanalyq taldaý degenimiz - úlken protsess. Onda árbir vaktsinanyń sapasy men qaýipsizdigi jiti tekseriledi» dedi ol.
Ortalyq Aziia aýmaǵynda qazaqstandyq zerthana alǵash ret Eýropa direktoratynyń zerthana sapasy boiynsha akkreditatsiiasyn aldy.
«Bizdiń zerthana jylyna 3 ret sapa boiynsha eýropalyq direktorattyń akkreditatsiiasynan ótedi. Eýropalyq organdar bizdiń derekterimizge senim artady. Tirkeýden ótken vaktsinanyń árbir partiiasy Qazaqstan Respýblikasynyń aýmaǵyna kirerde mindetti sapa men qaýipsizdik baǵalaýynan ótedi. Eger vaktsina halyqaralyq uiymdar arqyly alynsa, Dúniejúzilik densaýlyq saqtaý uiymynyń deńgeiinde tekserýden ótedi» dedi Arnur Nurtaev.
Qazirgi ýaqytta Qazaqstannyń ulttyq kúntizbesinde DDSU 20 vaktsinany qaita bekitti.
«20 vaktsina 28 mlrd teńgeden astam somaǵa satyp alynady jáne bir jasqa deiingi 370 myń balany qamtidy. Tirkeýden keiingi baqylaýdy Farmatsiialyq qadaǵalaý júiesi júrgizedi. Naryqtaǵy ekpeden qandai da bir janama áser týyndasa, farmakobaqylaý saraptama júrgizedi. Biz ekpeden paida bolýy múmkin degen árbir janama áserdi baqylaýǵa alamyz. Sońǵy bir jarym jylda janama áser týraly 70 shaǵym kelip tústi. 370 myń balaǵa ekpe salyp, 70 shaǵym aldyq. Bul 70 shaǵymdy da tekserdik, kúrdeli, aýyr oqiǵalar anyqtalmady» dedi A. Nurtaev.
