Qazaqstan boiynsha 53 kásiporynda eńbek daýy bar. QR Bas memlekettik eńbek inspektory Tólegen Ospanqulov ortalyq kommýnikatsiialar qyzmetinde ótken brifingide osyndai málimet berdi, dep habarlaidy QazAqparat.
«Byltyr qurylǵan sitýatsiialyq ortalyqtyń aiasynda kún saiyn Eńbek jáne halyqty áleýmettik qorǵaý ministrligi jergilikti ákimdiktermen birge eldegi kásiporyndardaǵy ahýal tekserilip otyrady. Bul ortalyqtyń málimetterine múddeli memlekettik organdardyń bári jalǵanǵan. Osy monitoringtiń deregi boiynsha, ortalyq qurylǵannan beri 500-den astam problemalyq kásiporyn tizimge engen. Memlekettik jáne jergilikti atqarý organdary qabyldaǵan sharalardyń arqasynda sol kásiporyndardyń 449-ynda másele sheshilgen. Olar qazir monitoringten alynyp tastaldy. Búgingi tańda monitoringte respýblika boiynsha 53 kásiporyn bar. Olar boiynsha jergilikti ákimdikter tiisti shara qabyldap jatyr. Joǵaryda atalǵan 449 kásiporyn boiynsha tek keiingi 4 jylda 34 narazylyq aktsiiasy ótken. Iaǵni, úsh saǵattan astam ýaqytqa jumys toqtatylǵan. Eńbek kodeksi boiynsha bul úshin ákimshilik-tártiptik jaýapkershilik qarastyrylǵan», - dedi komitet ókili.
Onyń sózine qaraǵanda, eńbek daýlarynyń 99 paiyzy - Mańǵystaý oblysyna tiesili.
«Óńirlerge jiktep aitsaq, 34 narazylyq aktsiiasynyń 33-i Mańǵystaý oblysynyń kásiporyndarynda bolǵan. Qalǵan bir aktsiia Atyraý oblysynda oryn aldy. 33 aktsiianyń ishinde 27-sinde qazir másele sheshilgen. Iaǵni, ondaǵy kásiporyndar josparly rejimde jumys istep tur. Jumys berýshilermen ymyraǵa kelý sharalarynyń arqasynda jumysshylar qoiǵan talaptar oryndaldy. Búginde qazir 6 kásiporynda narazylyq aktsiiasy jalǵasyp jatyr. Olar boiynsha ákimdikter Úkimet qaýlysy bekitken algoritm aiasynda shara qabyldap jatyr», - dedi Tólegen Ospanqulov.
