Indýstriia jáne infraqurylymdyq damý ministri Beibit Atamqulov aqyly joldardyń qaisynan qansha tabys kelip jatqany týraly aitty, dep habarlaidy "Ult aqparat".
«Bizdegi 4 aqyly joldyń jalpy uzyndyǵy – 680 shaqyrym. Nur-Sultan – Shýchinsk, Nur-Sultan – Temirtaý, Almaty – Qapshaǵai jáne Almaty – Qorǵas joldarynan túsetin jalpy tabys - 5,7 mlrd teńge boldy. Eń tabysty jol – eń qysqasy bolsa da, Almaty-Qapshaǵai ýchaskesi. Bul bólikten 1,6 mlrd teńgedei tabys keledi. Onyń bir bóligin «QazAvtoJol» basqa aqyly ýchaskelerge baǵyttady. Óitkeni Temirtaý men Shýchinskke astanadan qatynaityn joldar óte kúrdeli. Qysta jii qar alady. Shýchinsk jolynyń tabysy da 1,6 mlrd teńge bolady. Temirtaý men Qorǵaý ýchakesiniń kirisi shamamen 1,1 mlrd teńgeden», - dedi ol halyq aldyndaǵy eseptik kezdesýinen keiin ótken brifingte.
Beibit Atamqulov aqyly joldyń tabystylyǵy qozǵalystyń jiiligine jáne ótetin kólikterdiń tipine bailanysty ekenin eskertti. Sondai-aq, ol Qazaqstannyń aqyly joldarynda nege Eýropadaǵydai servis joq ekenin túsindirdi.
«Bizdegi aqyly joldar men Eýropany salystyryp jatady. Eýropadaǵy tyǵyzdyqty qarańyzdar. Joldardyń kirisi óte joǵary. Óitkeni kólik aǵyny óte tyǵyz. Al bizde 500 shaqyrymdyq joldyń boiynda birneshe shaǵyn eldi meken ǵana ornalasqan. Servis máselesi de osyǵan bailanysty. Bizde joldardy kútip ustaý óte qiyn. Qysta qar alǵanda tehnika ondaǵan shaqyrym jerden baratyn kezder bolady. Klimatymyz da, tyǵyzdyǵymyz da ártúrli. Joldarymyz óte uzyn, al halyqtyń sany az. Kólik sany boiynsha da kóptegen eldermen teńdese almaimyz. Bul kórsetkish joldyń tabystylyǵyna óte qatty áser etedi. Halqy men kólik sany tyǵyz elderde joldyń shyǵyny tez aqtalady. Ondaǵy baǵa da múlde basqasha», - dedi ministr.
