Memlekettik kirister komiteti kóshpeli tekserýsiz farmatsevtika qyzmetine taldaý júrgizdi, dep habarlaidy "Ult aqparat".
Dári-dármek satýǵa QQS salynbaityndyqtan, dárilik zattar ainalymy óndirýshiden sońǵy tutynýshyǵa deiin taýardyń tarihyn qadaǵalaýǵa múmkindik beretin taýarlardy baqylaý júiesine kirmeidi. Sondyqtan taldaý belgili bir kezeńde dárihana qandai paida alǵanyn qadaǵalaýǵa bolatyn onlain - BKM kórsetkishterine qurylǵan.
Jazdyń alǵashqy 2 aptasynda ǵana qazaqstandyq dárihanalar 10 milliard teńgeden astam tabys tapty. Alaida barlyq kásipker naqty ainalymdy kórsetpedi.
«Respýblika boiynsha dárihana qyzmet túrin kórsetetin barlyǵy 3 527 kásipker 7 674 onlain-BKM tirkegen. Onlain-BKM engizý salyq esebin kútpesten, ainalym somasyn ǵana emes, ótkizilgen taýar, jumys nemese qyzmet úshin esep aiyrysý kezinde ony qoldanbaityn kásipkerlerge de monitoring júrgizýge múmkindik beretinin atap ótý qajet. Mysaly, 868 dárihana ieleri onlain-BKM qoldanbaityny ańyqtaldy, bul rette olar óz qyzmetin toqtatqan joq. 239 dárihana belgili bir kúnderi chek shyǵarady, kei kúnderi onlain-BKM paidalanylmaidy, iaǵni túsim - nól. Kúndizgi túsimi 5000 teńgeden kem bolatyn 99 dárihana bar. Kún saiyn bir túsimdi kórsetetin dárihanalar bar, mysaly, dál 700 nemese 1000 teńge. Nátijesinde, 3 527 dárihananyń ishinen adal jáne zańǵa moiynsunatyn 60% nemese 2137 dárihana naqty ainalymyn kórsetti» dep málim etti komitet.
Osyǵan bailanysty memlekettik kirister komiteti azamattardy taýar, jumys nemese qyzmetterdi satyp alý kezinde chek talap ete otyryp, azamattyq belsendilik tanytýǵa shaqyrady.
13 mamyrda komitet jyl saiynǵy «Chek talap et — júlde utyp al» aktsiiasyn bastady. Jiberilgen chek úshin aktsiiaǵa qatysýshylar uialy telefon teńgerimine aqshalai qarajatty birden alý múmkindigine ie, al chekti bermegen jaǵdaida aktsiiaǵa qatysýshylar tiisti shaǵymdy uialy qosymsha arqyly jibere alady. Shaǵymdy rastaǵan jaǵdaida kepildi aqshalai qarajatty uialy telefon teńgerimine ala alady.
Sonymen qatar, dárilik zattar úshin QQS-syz EShF engizý máselesi týyndaidy. Bul ainalymdy da, baǵa belgileýdi de qadaǵalaýǵa múmkindik beredi.
Bul máseleni memlekettik kirister komiteti múddeli memlekettik organdarmen jáne biznespen pysyqtaityn boldy.
