Táýelsiz memleketter dostastyǵy baqylaýshylarynyń missiiasy Qazaqstandaǵy kezekten tys prezident sailaýyn erkin jáne ótkizildi dep tanydy. Bul týraly Ortalyq sailaý komissiiasyndaǵy brifingte missiianyń basshysy Sergei Lebedev málimdedi, dep habarlaidy Sputnik agenttigi.
Ol TMD-nyń segiz elinen kelgen 432 adam Qazaqstandaǵy sailaýdy baqylaǵanyn atap ótti. 20 mamyrdan beri baqylaýshylar respýblikanyń barlyq óńirinde bolyp, 3 812 sailaý ýchaskesine barǵan.
"Biz Qazaqstanda sailaý joǵary deńgeide uiymdastyrylǵan jáne erkin atmosferada ótti degen qorytyndyǵa keldik. Sailaý Konstitýtsiiaǵa jáne konstitýtsiialyq zańdarǵa sáikes ótkizildi. Ol ashyq, demokratiiaǵa sai jáne tartysty boldy", - delingen TMD missiiasy baqylaýshylarynyń málimdemesinde.
Missiia quramyna TMD elderiniń parlamentshileri, Ortalyq sailaý komissiialarynyń basshylary men diplomattar kirdi.
"Bizdiń oiymyzsha, ókildik joǵary deńgeii bizge sailaýdyń obektivti jáne aýqymdy kartinasyn alýǵa múmkindik berdi. Bul sailaý erekshe boldy. Táýelsiz Qazaqstan tarihynda alǵash ret Nursultan Nazarbaev sailaýǵa tikelei qatyspady. Onyń sailaý qarsańynda sóilegen sózinen el bolashaǵyna bei-jai qaramaityny sezildi. Ol eliniń bolashaǵyna alańdaidy", - dedi Lebedev brifingte.
TMD missiiasynyń basshysy sailaýǵa Elbasy ǵana emes, kóptegen qazaqstandyq alańdaýshylyq bildirgenin atap ótti. Sergei Lebedevtiń aitýynsha, bul joly egde tartqan adamdar ǵana emes, jas sailaýshylar da belsendilik tanytqan.
"Qazaqstanda poskeńestik kezeńdegi sailaýdy merekege ainaldyrý dástúri saqtalǵan – mýzyka oinap, býfetter jumys istedi. Múgedekterge arnaiy kabinalar men pandýstar boldy. 12 myńǵa jýyq múgedek osy jaǵdaidy paidalandy", - dedi TMD baqylaýshylar missiiasynyń basshysy.
Sonymen qatar, Sergei Lebedev sailaý aldyndaǵy naýqan kezinde atqarylǵan aqparattandyrý jumystaryna joǵary baǵa berdi. Qazaqstandyqtar jeti úmitkerdiń baǵdarlamasymen tolyǵymen tanysýǵa múmkindik aldy.
TMD missiiasynyń baqylaýshylary sailaý kezinde tirkelgen zań buzýshylyqtarǵa qatysty suraqqa jaýap bere kele, zań buzýshylyqtar az boldy degen qorytyndyǵa keldi.
"Ondaǵan kemshilik boldy, al daýys bergenderdiń sany toǵyz millionnan asady. Sondyqtan jalpy alǵanda bul sandar eleýsiz. Sandar Qazaqstan halqynyń erkine sai keledi. Biz bul sailaýdy moiyndaimyz", - dedi Sergei Lebedev.
