Qazaqstandaǵy birqatar joǵary oqý ornyna qatysty ákimshilik is qozǵaldy, dep habarlaidy "Ult aqparat" QR Bilim jáne ǵylym ministrliginiń resmi saityna silteme jasap.
«Bilim jáne ǵylym ministrligi memlekettik baqylaýdy júrgizýge kedergi keltiretin birqatar joǵary oqý ornyna qatysty tiisti sharalar qabyldamaq. Ákimshilik ister qozǵaldy, materialdar sotqa jiberildi», delingen ministrlik taratqan aqparatta.
Ondaǵy derekterge qaraǵanda, 2019 jyly Ortalyq Aziia ýniversitetinde jáne Aqtaý gýmanitarlyq-tehnikalyq ýniversitetinde (burynǵy Qazaqstan teńiz ýniversiteti) tekserý júrgizildi, onyń nátijeleri boiynsha bilim berý salasyndaǵy zańnama normalarynyń kóp buzylǵany anyqtaldy.
Búginge deiin atalǵan ýniversitetter tekserýdiń kelesi kezeńin júrgizýge kedergi keltiretin túrli sharalar (sot tártibimen shaǵymdaný, shaǵyn kásipkerlik sýbektisi retinde uiymdyq-quqyqtyq nysanyn ózgertý, qajetti materialdardy usynbaý jáne t.b.) qoldanyp keledi. Atalǵan eki joǵary oqý ornyna qatysty ákimshilik is qozǵalyp, materialdar mamandandyrylǵan sottarǵa jiberildi. Eki JOO da sot sheshimderiniń kúshine enýine qarai tekserýler júrgiziledi.
«Astana» ýniversitetinde josparly tekserý 2020 jyldyń basynda júrgizilýi kerek edi. Alaida ýniversitet qajetti materialdardy usynbady, osylaisha profilaktikalyq baqylaý júrgizýge kedergi keltirdi. Sot talqylaýynyń nátijesinde JOO-lar ákimshilik jaýapqa tartyldy.
Bul rette Aqtaý gýmanitarlyq-tehnikalyq ýniversiteti men «Astana» ýniversiteti tanylǵan arnaiy organdardyń tizilimine engizilgen akkreditteý agenttikterinde akkreditteýden ótpegen. Budan bólek, sońǵy eki jylda «Atameken» UKP ótkizetin joǵary oqý oryndarynyń bilim berý baǵdarlamalarynyń reitingi negizinen bul joǵary oqý oryndarynyń sońǵy pozitsiialarda ekenin kórsetedi.
«Bilim týraly» QR Zańyna sáikes, atalǵan joǵary oqý oryndary qazirgi ýaqytta 2020 jylǵy túlekterge diplom bere almaidy. Sońǵy kýrs stýdentteriniń múddelerin eskere otyryp, bul ýniversitetter diplom berý úshin akkreditteýden ótýi kerek.
«Talapkerlerdiń nazaryn joǵary oqý ornyn durys jáne sanaly túrde tańdaýǵa aýdarǵymyz keledi. Óitkeni 2021 jyldan bastap joǵary oqý oryndarynyń óz úlgisindegi diplomdarynyń bedeli bolady, bul keiinnen jumysqa ornalasýǵa áser etedi. Qazir barlyq túlek joǵary oqý ornynyń bedeline jáne onyń bilim berý naryǵyndaǵy jaǵdaiyna qaramastan, memlekettik úlgidegi birdei diplom alady. Bizdiń oiymyzsha, jumys berýshiler bolashaq mamandy «kim» daiyndaǵanyn bilýi kerek jáne JOO-lar arasynda myqty básekelestik bolýy kerek. Jeke úlgidegi diplomdar júiesin engizgennen keiin JOO -nyń talapkerler men jumys berýshiler aldyndaǵy jaýapkershiligi artady. Myqty maman bolý úshin nátijege jumys isteitin jáne belgili bir saladaǵy naryqta kóshbasshy bolyp tabylatyn ýniversitetti tańdaý kerek. Tek osylai ǵana joǵary bilim berý júiesin josyqsyz qyzmet kórsetýshilerden «tazartýǵa» bolady», – dep atap ótti QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
