Qazaqstan aýmaǵynda qurylǵan barlyq sailaý ýchaskesinde daýys berý júrip jatyr. Bul týraly QR Ortalyq sailaý komissiiasy tóraǵasynyń orynbasary Konstantin Petrov aitty, dep habarlaidy QazAqparat.
«Depýtattardy sailaý boiynsha daýys berý Qazaqstan Respýblikasynyń aýmaǵynda jáne odan tysqary jerde qurylǵan 10 060 sailaý ýchaskesinde júrgizilip jatyr. Sailaý komissiialary daýys berý orny men ýaqyty týraly der ýaqytynda aqparat berdi. Elorda ýaqytymen saǵat 08.00-de jaǵdai boiynsha elimizdegi 9 994 sailaý ýchaskesinde jáne shet memleketterdegi qazaqstan ókildikteri janyndaǵy 17 sailaý ýchaskesinde daýys berý bastaldy», - dedi ol.
Onyń atap ótýinshe, shet elderdegi 49 sailaý ýchaskesinde daýys berý saǵat beldeýin eskere otyryp júrgiziledi.
«9 qańtar kúni jergilikti ýaqyt boiynsha 18.00-de óńirlerde daýys berý quqyǵyna arnalǵan esepten shyǵarý kýálikterin berý aiaqtaldy. Sailaýshylardyń jazbasha ótinishteri negizinde ýchaskelik sailaý komissiialary Parlament Májilisi depýtattaryn sailaýda daýys berý quqyǵyna arnalǵan 10 599 esepten shyǵarý kýáligin berdi. Osy esepten shyǵarý kýálikterimen azamattar ózderi barǵan kez kelgen jerdegi ýchaskede daýys bere alady. Barlyq deńgeidegi máslihat depýtattaryn sailaý boiynsha 11 612 esepten shyǵarý kýáligi berildi. Jergilikti atqarýshy organdar men sailaý komissiialary sailaýshylar tiziminiń tolyqtylyǵyn ári naqtylyǵyn qamtamasyz etýde úlken jumys atqardy. Daýys berý bastalǵan kezde sailaýshylardyń tizimine 11 915 903 sailaýshy qosyldy. Ortalyq sailaý komissiiasy árbir eki saǵatta ótetin brifing barysynda sailaýshylardyń kelýi týraly aqparat usynatyn bolady», - dedi Konstantin Petrov.
