QR IIM tótenshe jaǵdailar komitetiniń tóraǵasy Vladimir Bekker elimizdegi saýda ortalyqtarynda órt qaýipsizdigi qalai tekseriletinin aitty, dep habarlaidy Sputnik Qazaqstan tilshisi.
"Búginde elimizde shamamen 1151 saýda ortalyǵy bar, biyl barlyǵy tekseristen ótedi. Osyndai qaiǵyly oqiǵalardy eskerip, men evakýatsiia joldaryn, órtti anyqtaý júiesi men qaýipsizdikti qamtamasyz etý jaǵdaiyna erekshe kóńil bólýdi tapsyrdym", — dedi Bekker.
Onyń aitýynsha, órt qaýipsizdigin saqtamaǵan saýda ortalyqtaryna 50 AEK nemese 120 250 teńge aiyppul salynady.
"Jabyq turǵan ár esik úshin aiyppul salmaimyz. Ákimshilik hattama toltyrylady, barlyq zań buzýshylyq soǵan tirkelip, ákimshilik jaýapkershilikke tartylady. Eger ekinshi tekseris kezinde zań buzýshylyq joiylmasa, materialar sotqa joldanady. Ol kezde aiyppul mólsheri ósip, 100 AEK-ti quraidy nemese nysannyń qyzmeti ýaqytsha toqtatylýy múmkin. Byltyr mundai sharany 21 ret qoldandyq", — dedi ol.
TJK basshysy qazaqstandyqtar qaýipsizdik talaptaryn buzǵan saýda oryndaryna jazbasha túrde shaǵymdana alatynyn aitty.
"Sýret pen video joldaǵan jaqsy, árine. Biraq zańnamaǵa sáikes jazbasha aryz qajet. Biz qazir osy júiemen jumys istep jatyrmyz. Tekseristi qatańdatý úshin birqatar usynys daiyndap qoidyq. Josparly tekseris ne ekenin sizder jaqsy bilesizder. Kásipker tekseris josparyna engizilgenin kóredi. Onyń ústine, biz bir ai buryn tekseris úshin keletinimizdi habarlaimyz. Árine olar daiyndalady. Al biz saýda nysandary qojaiyndarynyń jaýapkershiligin kóterýimiz kerek. Saýda ortalyǵyndaǵy qaýipsizdik úshin memlekettik inspektor emes, eń áýeli sol nysannyń qojaiyny qam jeýi kerek", — dedi Bekker.
Jýrnalister komitet tóraǵasynan "balalaryńyz ben nemerelerińizdi Astanadaǵy saýda ortalyqtaryna jiberesiz be?" dep surady.
"Shynymdy aitaiyn, bul jaiynda oilanyp qaldym", — dep qysqa qaiyrdy Bekker.
Eske sala ketsek, 25 naýryz kúni Reseidiń Kemerovo qalasyndaǵy saýda ortalyǵynda órt shyǵyp, 64 adam qaza tapqan bolatyn.
