Foto: ULT.KZ
"QazTehna" avtobýs jáne kommertsiialyq tehnika shyǵaratyn zaýyt osydan 4 jyl buryn óz jumysyn bastaǵan. Búginde 700 adam eńbek etip jatqan zaýytta jylyna 1,5 myńnan artyq avtobýs óndirilip, elimizdiń túkpir-túkpirine jóneltiledi.
ULT.KZ tilshisi Saran qalasynda ornalasqan zaýytqa baryp, óndiristiń qalai júrip jatqanymen tanysty.
Zaýyt mamandary tilshilerge avtobýs qańqasynyń negizgi bólikteri jinalatyn dánekerleý tsehynan bastap, boiaý tsehy, qurastyrý tsehy jáne tehnikany synaý jelisine deiin zaýyttyń barlyq óndiristik keshenin kórsetti.
Foto: ULT.KZ
Foto: ULT.KZ
Búgingi tańda "QazTehna" zaýytynyń óndiristik portfeline qalalyq, týristik, qalaaralyq, sondai-aq Yutong markaly arnaiy maqsattaǵy avtobýstardyń keń assortimenti, Sinotruk jáne Scania brendiniń kommertsiialyq tehnikasy kiredi.
Foto: ULT.KZ
"QazTehna" bas direktory Arǵulan Maiqonov:
«Avtobýs jáne arnaiy tehnika óndiretin bizdiń zaýyt 2020 jyly burynǵy rezina-tehnikalyq ónimi zaýytynyń bazasynda quryldy. Qazirgi ýaqytta zaýytymyzdyń jobalaý qýaty jylyna 1200 birlikti qurap otyr. Bizdiń negizgi seriktesimiz avtobýs óndirýde álemge áigili Yutong brendi. 2020 jyly zaýyttyń rekonstrýktsiiasyn bastaǵanbyz, 2021 jyly ónimimizdiń alǵashqylaryn shyǵara bastadyq. Qurylǵylardy óndiristi damytý qory arqyly aldyq. Bul bizge zaýyt jumysyn tez jolǵa qoiýǵa kómektesti. 2022 jyly Qazaqstandaǵy avtobýstar naryǵynyń 63 paiyzyn qamtydyq», -dep otyr A. Maiqonov.
Zaýytta 2021 jyly 165 birlik tehnika, 2022 jyly 568 birlik tehnika óndirilse, 2023 jyly 1 579 birlik tehnika shyǵarylǵan eken. Al biylǵy jyly 1 648 birlik tehnika shyǵarý josparlanyp otyrǵan kórinedi.
Foto: ULT.KZ
Zaýyttyń qurastyrý tsehy sheberi Niiaz Tursynov:
«Osy zaýytqa alǵash 2020 jyly dárnekerleýshi bolyp jumysqa ornalastym. Sosyn kásiporynnyń oqý ortalyǵynda ózime qajetti mamandyqtarǵa oqyp, qurastyrý tsehynyń sheberi bolyp jumysqa turdym. Oqý jarty jyl ýaqyt aldy. Oqýǵa jumys arasynda arnaiy ýaqyt bólinedi sol kezde oqyp júrdim. Alǵash jumysqa kirgende jalaqym 150 myń teńge bolǵan, birte-birte ailyǵym ósip, qazir 300-450 myń teńge shamasynda alamyn. Endigi maqsatym tsehtyń bastyǵy bolý», -deidi ol.
Aita keteiik, kásiporynda qyzmetkerlerdi daiarlaý úshin "QazTehna" JShS Oqý ortalyǵy jumys isteidi. Ol zaýyt qyzmetkerlerine kásibi ósý men mansapty damytýǵa múmkindik berý úshin 12 jumysshy mamandyǵy boiynsha oqytady. Oqý bitirgenderge kýálikter men sertifikattar beriledi.
Foto: ULT.KZ
Qzirgi tańda zaýytta qyzmetkerler sany ósip keledi eken, «onyń negizgi faktorlary ótemaqy paketiniń bolýy» dep otyr mamandar. Oǵan turaqty jalaqy, mindetti meditsinalyq aýdarymdar, tamaqtaný aqysy, Qaraǵandydan, Saran, Temirtaý, Abai, Shahan jáne Shahtinsk spýtniktik qalalarynan jumysshylardy tasymaldaý kiredi.
Foto: ULT.KZ
Kishi torap tsehynyń basshysy Jaras Isabekov:
«Osy zaýyt endi salyna bastaǵanda dánekerleýshi bolyp jumysqa ornalasqanmyn. Qurylǵylardyń montajyn, demontajyn zaýyt ashylǵaly baqylap, sol ýaqyttan beri osy jerde jumys istep kele jatyrmyn. Onyń aldynda 7 jyl temirjolda istedim. Jańa zaýyt, jańa óndiriste isteý qyzyqty bolyp kóringesin osy zaýytta jumys isteýge kelisim berdim. Onyń ústine bala kúnimnen kólikterge, olar qalai qurastyrylatynyna qyzyǵatynmyn. Osy salada ózimniń bolashaǵymdy kórdim», -deidi maman.
