Qazaqstandaǵy Amerika Qurama Shtattarynyń elshisi Ýiliam Mozer qazaqstandyqtandy koronavirýsqa qarsy vaktsina saldyrýǵa shaqyrdy, dep habarlaidy QazAqparat.
«Aldymen qasietti Ramazan aiynda jyly tilekterimdi bildirgim keledi. Oraza qabyl bolsyn! Birge jinalyp, kóptegen rizyqtarǵa shúkirshilik etýdiń jáne aramyzdan ketken adamdardy eske alýdyń mańyzdylyǵy biyl erekshe seziledi. Aldaǵy Ramazan ailarynda áleýmettik qashyqty saqtap, maska taǵý qajettigi bolmasyn dep shyn júrekten tileimin. Bul taqyrypta men optimistik kózqarastamyn, biz pandemiiany jeńýge jaqyndap qaldyq. Vaktsinalar búkil álemde, sonyń ishinde AQSh elshilikterinde de salynyp jatyr. Men ózim alǵashqy dozany ótken aptada aldym jáne múmkindiginshe barlyq qazaqstandyqtardy vaktsina alýǵa shaqyramyn», - dedi Ý. Mozer AQSh elshiligi uiymdastyrǵan onlain dóńgelek ústelde.
Elshi amerikalyq Moderna vaktsinasyn alǵan jáne ekpeden keiingi jai-kúiin aityp berdi.
«Men Moderna vaktsinasyn aldym jáne ekpeden keiin sol qolymnyń aýyrsynǵanyn baiqadym. Biraq, men ekpeni oń qolyma alǵan edim, bul shyndyq. Kelesi kúni shanshý bolǵanyn sezdim, basqa eshqandai áseri baiqalmady. Balalarym da Moderna jáne Pfizer vaktsinalaryn aldy, olar ekinshi ekpeden keiin janama áser kóbirek bolatynyn aitýda. Biraq, qorqatyn jait emes, az ǵana ýaqytqa álsizdik sezilýi múmkin», - dep jaýap berdi elshi jýrnalister suraǵyna.
Sonymen birge, Ý. Mozer AQSh-taǵy vaktsinalaý jumystary jóninde baiandady.
«Dúisenbi kúni AQSh úshin óte mańyzdy kún boldy. Óitkeni, bizdiń prezident Baiden myrza 19 sáýirden bastap, 16 jasqa tolǵan árbir eresek azamattyń vaktsina alatynyn málimdedi. Elde vaktsina kólemi jetkilikti jáne shamamen jazdyń sońyna deiin ujymdyq immýnitetke qol jetkizetin shyǵarmyz. Qazaqstanda da tezirek ujymdyq immýnitet bolýyn tileimiz. Eger sizde vaktsina alatyn múmkindigińiz bolsa, ótinemin, alyńyz. Óitkeni bul elińiz úshin, ózińiz úshin jáne búkil álemniń saýlyǵy úshin óte mańyzdy», - dep qorytyndylady AQSh elshisi.
