2019 jyly el aýmaǵynda zańsyz 9 myń qoqys alańy anyqtaldy. Bul týraly Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«Sanktsiialanbaǵan qoqys alańdarynyń ósip kele jatqanyna basa mańyz berý kerek. Ǵaryshtan jasalǵan monitoringke qaraǵanda, 2019 jyly el aýmaǵynda zańsyz 9 myń qoqys alańy anyqtaldy. Ministrlik olardyń bárin joiý kestesin ázirledi. Olardyń 30 paiyzy (2,7 myńy – kólemi 400 myń tonnalyq qoqys) joiyldy. Al bul kólem ainalyp kelgende Aqtóbe oblysy men Nur-Sultan qalasynda bir jylda jinalyp qalatyn qoqyspen teń», - dedi Maǵzum Myrzaǵaliev OKQ ótken halyqqa esep berý kezdesýinde.
Áitse de ministr keibir óńirde mundai qoqystardy joiý jumystary burynǵysynsha qalyp qoiyp jatqanyn aitady. Atap aitqanda Aqtóbe men Aqmola oblysynda qoqystyń joiylý deńgeii 3 paiyzdan aspaidy.
«Zańsyz qoqys tógý máselesin sheshý úshin Ekologiialyq kodekste qoqys tasityn kólikterge GPS ornatý josparlanyp otyr», - dedi ol.
