Eldegi 127 kóterme jáne bólshek saýda bazarynda baǵany baqylaýǵa arnalǵan tekserýler júrip jatyr, dep habarlaidy QazAqparat.
Bul jóninde Májilistiń jalpy otyrysynan keiin BAQ ókilderine bergen suhbatynda QR Premer-Ministriniń orynbasary – Saýda jáne integratsiia ministri Baqyt Sultanov aitty.
«Infliatsiiaǵa qarsy sharalar qabyldadyq. Onyń biri baǵany turaqty ustap turýǵa baǵyttalǵan. Munyń aiasynda 67 shara kózdelgen. Júieli sharalar ónimderdiń tapshylyǵyn boldyrmaýdy, sapaly bolýy jáne baǵa boiynsha qoljetimdi bolýyn qamtidy. Bul baǵytta Aýyl sharýashylyǵy ministrliginiń baǵdarlamasy qatar jumys istep jatyr. Ol baǵdarlama qajetti ónimdermen orta merzimde qamtamasyz etýge baǵyttalǵan. Azyq-túlik ónimderimen 100 paiyz qamtamasyz etip, 6 importtyq taýardyń baǵasyn túsirý jáne importqa táýeldilikti barynsha azaitý josparlanyp otyr», - degen ministr «Egisten sórege deiin» atty joba da máselege arnalǵanyn eske saldy.
Aitýynsha, azyq-túlik baǵasyn 15 paiyzdyq mejeden ósirmei ustap turý úshin, tipti aýdan ortalyqtarynda da tekserý bastalyp ketken.
«Óńirlerde arnaiy shuǵyl sharalar júrip jatyr. Kóterme bazarlardy tekserýge berilgen moratoriidiń alynyp tastalýyna bailanysty 127 kóterme jáne bólshek bazarda arnaiy tekserýler júrgizilip jatyr.
Odan bólek baǵany el arasyndaǵy dúrligýdi paidalana otyryp kóterý máselesi bar. Bul máseleni monitoring toptardyń kómegimen sheship jatyrmyz. Búginde aldyna ala aralap, zańmen bekitilgen 15 paiyzdyq mejeden artyq baǵany kóterýge bolmaityny týraly eskertý jasaldy. Sonyń aiasynda oblys ortalyqtaryndaǵy aýla dúkenderiniń 85 paiyzyn qamtydyq. Ótken aptadan beri mundai tekserýler aýdan ortalyqtarynda da bastaldy. Munyń báriniń óz nátijesi bolady dep oilaimyn.
Onyń ústine ainalym qarajatyn arttyrý úshin qosymsha 100 mlrd teńge bólindi. Turaqtandyrý qorlarymen de juys istep jatyrmyz. Osyndai keshendi sharalardyń arqasynda jyldyq esepte baǵa ósimin 10 paiyz kóleminde ustap turý múmkin bolyp otyr», - dedi Baqyt Sultanov.
