ەلدەگٸ 127 كٶتەرمە جەنە بٶلشەك ساۋدا بازارىندا باعانى باقىلاۋعا ارنالعان تەكسەرۋلەر جٷرٸپ جاتىر, دەپ حابارلايدى قازاقپارات.
بۇل جٶنٸندە مەجٸلٸستٸڭ جالپى وتىرىسىنان كەيٸن باق ٶكٸلدەرٸنە بەرگەن سۇحباتىندا قر پرەمەر-مينيسترٸنٸڭ ورىنباسارى – ساۋدا جەنە ينتەگراتسييا مينيسترٸ باقىت سۇلتانوۆ ايتتى.
«ينفلياتسيياعا قارسى شارالار قابىلدادىق. ونىڭ بٸرٸ باعانى تۇراقتى ۇستاپ تۇرۋعا باعىتتالعان. مۇنىڭ اياسىندا 67 شارا كٶزدەلگەن. جٷيەلٸ شارالار ٶنٸمدەردٸڭ تاپشىلىعىن بولدىرماۋدى, ساپالى بولۋى جەنە باعا بويىنشا قولجەتٸمدٸ بولۋىن قامتيدى. بۇل باعىتتا اۋىل شارۋاشىلىعى مينيسترلٸگٸنٸڭ باعدارلاماسى قاتار جۇمىس ٸستەپ جاتىر. ول باعدارلاما قاجەتتٸ ٶنٸمدەرمەن ورتا مەرزٸمدە قامتاماسىز ەتۋگە باعىتتالعان. ازىق-تٷلٸك ٶنٸمدەرٸمەن 100 پايىز قامتاماسىز ەتٸپ, 6 يمپورتتىق تاۋاردىڭ باعاسىن تٷسٸرۋ جەنە يمپورتقا تەۋەلدٸلٸكتٸ بارىنشا ازايتۋ جوسپارلانىپ وتىر», - دەگەن مينيستر «ەگٸستەن سٶرەگە دەيٸن» اتتى جوبا دا مەسەلەگە ارنالعانىن ەسكە سالدى.
ايتۋىنشا, ازىق-تٷلٸك باعاسىن 15 پايىزدىق مەجەدەن ٶسٸرمەي ۇستاپ تۇرۋ ٷشٸن, تٸپتٸ اۋدان ورتالىقتارىندا دا تەكسەرۋ باستالىپ كەتكەن.
«ٶڭٸرلەردە ارنايى شۇعىل شارالار جٷرٸپ جاتىر. كٶتەرمە بازارلاردى تەكسەرۋگە بەرٸلگەن موراتورييدٸڭ الىنىپ تاستالۋىنا بايلانىستى 127 كٶتەرمە جەنە بٶلشەك بازاردا ارنايى تەكسەرۋلەر جٷرگٸزٸلٸپ جاتىر.
ودان بٶلەك باعانى ەل اراسىنداعى دٷرلٸگۋدٸ پايدالانا وتىرىپ كٶتەرۋ مەسەلەسٸ بار. بۇل مەسەلەنٸ مونيتورينگ توپتاردىڭ كٶمەگٸمەن شەشٸپ جاتىرمىز. بٷگٸندە الدىنا الا ارالاپ, زاڭمەن بەكٸتٸلگەن 15 پايىزدىق مەجەدەن ارتىق باعانى كٶتەرۋگە بولمايتىنى تۋرالى ەسكەرتۋ جاسالدى. سونىڭ اياسىندا وبلىس ورتالىقتارىنداعى اۋلا دٷكەندەرٸنٸڭ 85 پايىزىن قامتىدىق. ٶتكەن اپتادان بەرٸ مۇنداي تەكسەرۋلەر اۋدان ورتالىقتارىندا دا باستالدى. مۇنىڭ بەرٸنٸڭ ٶز نەتيجەسٸ بولادى دەپ ويلايمىن.
ونىڭ ٷستٸنە اينالىم قاراجاتىن ارتتىرۋ ٷشٸن قوسىمشا 100 ملرد تەڭگە بٶلٸندٸ. تۇراقتاندىرۋ قورلارىمەن دە جۇىس ٸستەپ جاتىرمىز. وسىنداي كەشەندٸ شارالاردىڭ ارقاسىندا جىلدىق ەسەپتە باعا ٶسٸمٸن 10 پايىز كٶلەمٸندە ۇستاپ تۇرۋ مٷمكٸن بولىپ وتىر», - دەدٸ باقىت سۇلتانوۆ.
