Senat depýtaty Andrei Lýkin eldegi zańsyz altyn ainalymy máselesine nazar aýdardy. Onyń málimetinshe, elimizde kenshilikpen zańsyz ainalysatyndar jyl saiyn 25 tonnaǵa jýyq baǵaly metall óndiredi, dep habarlaidy "Ult aqparat" Malim.kz basylymyna silteme jasap.
Palata otyrysynda Lýkin 2020-2023 jyldar aralyǵynda Qazaqstanda altynnyń zańsyz ainalymyna qatysty 7 qylmystyq is tergelip, onyń 4-i sotqa jiberilgenin aitty. Keltirilgen shyǵyn 1,5 milliard teńgeden asqan.
"Bas prokýratýranyń málimetinshe, sońǵy 4 jylda zańsyz ainalymǵa, baǵaly metaldardy óndirýge jáne urlaýǵa qatysty 133 qylmys tirkelgen", - dedi Lýkin.
Depýtat 2023 jyldyń qarashasynda jalǵan kenshilerden altyn ónimderin satyp alýmen ainalysqan qylmystyq toptyń joiylǵanyn mysalǵa keltirdi.
"Keiin astyrtyn tsehtarda osyndai altynnan belgili brendterdiń atyn jamylyp jasalǵan buiymdar Astana jáne Shymkent qalalaryndaǵy saýda úilerinde satylǵan. Tekserý kezinde qylmyskerlerden 1 keliden astam altyn men 100 dana buiym tárkilendi", - dedi senator.
Parlament depýtattary mundai zań buzýshylyqtarmen kúresý úshin altyn kenishterindegi baqylaýdy kúsheitý kerek dep sanaidy.
"Shamamen eseptesek, zańdy túrde óndirilgen árbir úsh tonna altynmen birge bir tonna altyn zańsyz óndiriledi eken. Respýblika boiynsha, bul kórsetkish jylyna 25 tonna altyndy quraidy. Máseleni sheshýdiń basty joly - baqylaýdy kúsheitý", - dedi senator.
.jpg)
