Qazaqstanda «Jylýmen jabdyqtaý týraly» zań jobasyn ázirlepin jatyr, dep habarlaidy "Ult aqparat" Energetika ministrligine silteme jasap.
Tujyrymdama jobasy «Atameken» UKP-da, zańdy tulǵalar birlestiginde talqylaýǵa joldanǵan, normativtik quqyqtyq aktilerdiń ashyq portalynda jáne Energetika ministrliginiń resmi saitynda ornalastyrylǵan.
Búginde Qazaqstanda jylý energetikasy salasyn retteitin biryńǵai salalyq zań joq. Sala máseleleri «Elektr energetikasy týraly» zańda ishinara kórsetilgen, biraq barlyq qajetti aspektilerdi qamtymaidy.
Jylýmen jabdyqtaý salasyndaǵy negizgi problemalardyń biri-negizgi jabdyqtyń joǵary tozýy (orta eseppen 59% deńgeiinde) jáne jabdyqtyń paidaly áser koeffitsientiniń tómen bolýy (orta eseppen 35-50%).
Sonymen qatar, jylýmen jabdyqtaý salasyndaǵy memlekettik organdardyń ókilettikterin aiqyndaý qajet. Salany memlekettik retteýdi birneshe memlekettik organ júzege asyrady: Energetika ministrligi - energiia óndirý salasyndaǵy saiasatty, Indýstriia jáne infraqurylymdyq damý ministrligi – jylý energiiasyn berý jáne tutyný salasyndaǵy saiasatty, Ulttyq ekonomika ministrligi – tarif belgileýdi. Bul rette, Qazaqstanda jylý energetikasy salasynda memlekettik baqylaý men qadaǵalaý qarastyrylmaǵan.
Jylýmen jabdyqtaý salasyna investitsiialar tartý tetigin engizý talap etiledi. Tabiǵi monopoliialar sýbektileriniń (energiia óndirýshi jáne energiia berýshi uiymdardyń) tarifteri jylý energiiasyn óndirýge jáne berýge naqty shyǵyndardy jappaidy, bul salanyń investitsiialyq tartymdylyǵyna keri áser etedi.
Qujat Qazaqstan Úkimetiniń zań jobalaý jumystarynyń 2022 jylǵa arnalǵan josparyna engiziletin bolady.
