QR Básekelestikti qorǵaý jáne damytý agenttigi tóraǵasynyń orynbasary Marat Omarov Qazaqstanda jylý energiiasyna tarifterdiń ósýi múmkindigine qatysty suraqqa jaýap berdi, dep habarlaidy QazAqparat.
«Jylý energetikasy tabiǵi monopoliia salasy bolyp sanalady, básekelestik naryǵy emes. Bul turǵyda bizde tariftik retteý bar. Zańnamada tariftik retteýdiń negizgi maqsaty eskerilgen, iaǵni tutynýshy men jylý energiiasy óndirýshileri múddeleri arasyndaǵy teńgerimdi aiqyndaý qarastyrylǵan», - dedi M. Omarov Ortalyq kommýnikatsiialar qyzmetinde.
Onyń aitýynsha, elimizde tarifti qalyptastyrýdaǵy qadamdar shyǵyn tetigi boiynsha júrgiziledi, iaǵni tarif tabiǵi monopoliialar sýbektileri kórsetetin shyǵynnyń negizinde qalyptasady. Osy oraida ol bul qadamdy yntalandyrýshy tarifti qalyptastyrýǵa aýystyrý usynysy jasalǵanyn eske saldy.
Sonymen qatar agenttik ókiline tilshiler jylý energiiasynyń qymbattaýy múmkindigine qatysty suraq qoidy.
«Jalpy, bizde baǵa retteletin naryqtarda ǵana emes, sonymen qatar básekelestik naryqtarda da kóterilip jatyr. Barlyq jerde shikizatqa, elektr energiiasyna, energiia resýrstaryna shyǵyndardyń artýyna bailanysty osy protsesti baiqaýǵa bolady. Sondyqtan bul protsess tariftiń ósýine qarai jyljyp keledi. Alaida shyǵyndy tásildi saqtaý nemese yntalandyrýshy ádistemeni engizý tikelei tariftiń ósýine yqpal etpeidi. Bul turǵyda osy naryqtarda tarifti qalyptastyrý tetikterine qatysty bolyp tur», - dedi Marat Omarov.
