QR IIM ákimshilik politsiia komiteti tóraǵasynyń orynbasary Jandos Muratáliev balalardyń joldaǵy qaýipsizdigi máselesin kóterdi, dep habarlaidy QazAqparat.
«Balalardyń joldaǵy qaýipsizdigin qamtamasyz etý máselesi qashanda ózekti bolyp qala beredi. Ókinishke orai, respýblika joldarynda bolatyn árbir tórtinshi jol-kólik oqiǵasy kámeletke tolmaǵandardyń qatysýymen bolyp otyr. Jyl basynan beri osyndai jol-kólik oqiǵalarynda 90 bala qaza taýyp, 1 860-sy jaraqat aldy», - Jandos Muratáliev ministrlikte ótken brifingte.
Onyń aitýynsha, pandemiia men halyqtyń áleýmettik oqshaýlanýynda jáne mektep oqýshylarynyń kópshiligi qashyqtan oqýǵa kóshirilgende jasóspirimder arasyndaǵy túsindirý jumystary da tómendegen. Osyǵan orai, Ishki ister ministrligi oqý jyly qarsańynda 23 tamyzdan bastap balalardyń jol-kólik jaraqattarynyń aldyn alý maqsatynda «Abailańyz – balalar!» respýblikalyq jedel-profilaktikalyq sharasyn ótkizedi.
«Shara aiasynda bilim berý mekemeleri aýmaǵyndaǵy kóshe-jol toraptarynyń jumys kúiin jáne jol júrisin uiymdastyrýdyń tehnikalyq quraldary zerttelýde. Jol jáne kommýnaldyq qyzmet ókilderimen birge jolǵa jaqyn ornalasqan bilim berý mekemeleriniń aýmaǵyna 4 myńnan astam tekserý jumystary júrgizildi. Tekserý nátijeleri boiynsha anyqtalǵan kemshilikterdi joiý úshin ýákiletti mekemelerge 2 myńǵa jýyq nusqama berildi», - deidi spiker.
Sonymen birge, bilim berý mekemeleri janynda 2 myńǵa jýyq jol belgileri aýystyrylyp, qaita ornatyldy, myńǵa jýyq jaiaý júrginshiler ótkelderi jabdyqtaldy, 20 myń metr jaiaý júrginshiler joldary salyndy, 26 myń metr joldar jasandy jaryqtandyrýmen jabdyqtaldy.
«1 qyrkúiekten bastap, bilim berý mekemeleriniń janynda politsiia jasaqtarynyń tyǵyzdyǵy artady. Jańa oqý jylynyń bastalýymen elimizdiń joldarynda balalar sany artady. Osy oraida jol júrisine qatysýshylardy barlyq qaǵidalardy qatań saqtaýǵa jáne jolda qyraǵylyqty joǵaltpaýǵa shaqyramyz», - deidi J. Muratáliev.
