© photo: Sputnik / Stringer
Jyl basynan beri elimizdiń kólik politseileri temir joldy belgilenbegen jerlerden kesip ótken 15 355 adamdy anyqtap, ákimshilik jaýapkershilikke tartty, - dep habarlaidy "Ult aqparat" Kóliktegi politsiia departamentine silteme jasap.
Poiyz astyna 42 azamat túsip, oqiǵanyń teń jartysy ólimmen aiaqtalǵan. 3 derek boiynsha balalar zardap shegip, barlyǵy qaitys bolǵan.
"Sondai-aq poiyzdardyń shuǵyl tejelýiniń faktileri de oryn alyp jatady. Aǵymdaǵy kezeńde 930 fakt tirkeldi, onyń ishinde: adamdardyń bolýy sebebinen - 224, temirjol tóseminde úi janýarlarynyń bolýyna bailanysty 572 fakti jáne t.b.
Máselen, ótken demalys kúnderi tórt adam poiyz astyna túsip kete jazdady. Bul oqiǵalar Aqmola, Qyzylorda jáne Shyǵys Qazaqstan oblystarynda tirkeldi. Abyroi bolǵanda, barlyq jaǵdaida poiyz mashinisteri jyljymaly quramdy toqtatyp, qaiǵyly jaǵdaidyń aldyn aldy. Joǵarydaǵy derekter boiynsha quqyqbuzýshylarǵa qatysty QR ÁQBtK 559-babynyń 5-bóligimen (belgilenbegen jerlerde temirjol arqyly ótý) ákimshilik hattama toltyryldy" - delingen habarlamada.
Vedomstvo málimetinshe, kólik politseileri jazataiym oqiǵalardyń aldyn alý jáne jolyn kesý maqsatynda turaqty negizde profilaktikalyq sipattaǵy jumystar júrgizip jatyr. Onyń ishinde halyqpen 1588 kezdesý, jolaýshylar poiyzdarynda 1772 kezdesý, oqý oryndarynda 1814 dáris ótkizilgen. Barlyq is-sharada temirjol kóligi obektilerindegi negizgi qaýipsizdik erejeleri túsindirilgen.
