QR Densaýlyq saqtaý ministrliginiń resmi ókili Baǵdat Qojahmetov Qazaqstanda koronavirýsqa qarsy alǵashqy vaktsinatsiia egilgeni týraly aqparatqa túsinikteme berdi, dep habarlaidy QazAqparat.
Qazaqstandaǵy koronavirýsqa qarsy alǵashqy vaktsinatsiia Qazaq ulttyq agrarlyq ýniversiteti janyndaǵy Halyqaralyq vaktsinatsiia ortalyǵynda ótkizildi. Vaktsinatsiiadan ótken alǵashqy qazaqstandyq - ortalyq direktory Qaisar Tabynov. Oǵan Avstraliiada jasalǵan COVAX-19 preparaty salyndy. Preparat qazirgi ýaqytta klinikalyq zertteýlerdiń birinshi satysynda. QR Densaýlyq saqtaý ministrliginiń resmi ókili Baǵdat Qojahmetov tiisti erejeler bar ekenin, olarǵa sáikes taýarlar men qyzmetterdiń sapasyn baqylaý komiteti osyndai klinikalyq synaqtardy ótkizýge ruqsat berýi kerektigi týraly aitty.
«Bul ońai isteletin jumys emes. Bizde Densaýlyq kodeksi, tiisti erejeler men reglamentter bar. Osy erejelerge sáikes Taýarlar men qyzmetterdiń sapasy men qaýipsizdigin baqylaý komiteti osyndai klinikalyq synaqtarǵa ruqsat berýi kerek. Ol úshin arnaiy hattamalar men protsedýralar bar. Búgingi tańda Densaýlyq saqtaý ministrligine QazUAÝ janyndaǵy Halyqaralyq vaktsinatsiia ortalyǵynan mundai ótinish túsken joq. Tiisinshe, saraptama qorytyndysyn alý úshin olar dári-dármekter men meditsinalyq maqsattaǵy buiymdardy ulttyq saraptaý ortalyǵyna habarlasýy kerek. Sodan keiin olar munymen ainalysa alady», - deidi Baǵdat Qojahmetov.
Onyń aitýynsha, kez kelgen dári-dármekti jasaý biraz ýaqytty alady, óitkeni bul uzaq jáne aýyr protsess.
«Men naqty aitamyn: ýákiletti organ - QR Densaýlyq saqtaý ministrligi eshkimge mundai ruqsat bergen joq, biz ótinish alǵan joqpyz. Kez kelgen dárilik preparattyń jasalýy birneshe kezeńnen turatyn uzaq jáne aýyr protsess. Nátijesinde onyń qaýipsizdigi, tiimdiligi men sapasy rastalady. Bul óte kúrdeli másele», - deidi ol.
Aita ketsek, búgin birqatar qazaqstandyq BAQ-ta Qazaqstanda alǵash ret koronavirýsqa qarsy vaktsinatsiia júrgizilgeni týraly aqparat taraǵan bolatyn.
