Qazaqstanda júk tasymaly 2 jyl qatarynan 4 mlrd tonnadan asyp jyǵyldy. Barlyq júkterdiń 84 paiyzy avtokólikpen tasymaldansa, barlyq kiristiń 58 paiyzy qubyr jelisimen jetkizýden túsip otyr, dep habarlaidy "Ult aqparat" ranking.kz-ke silteme jasap.
2019 jyly kóliktiń barlyq túrimen júkterdi tasymaldaý kólemi 4,2 mlrd tonnany qurady. Bul 2018 jylǵy kórsetkishten 3,3 paiyzǵa artyq. Aita keterligi, kórsetkish úshinshi jyl qatarynan ósim kórsetip otyr.
Qazaqstannyń óńirleri arasynda eń kóp júk tasymaly 864 mln tonna kóleminde Qaraǵandy oblysynda tirkelgen. Atalǵan kórsetkish 2018 jyldan 4,6 paiyzǵa kóp. Munan keiingi oryndaǵy Shyǵys Qazaqstan oblysynda bir jyl ishinde júk tasymaly 5,4 paiyzǵa artyp, 662,2 mln tonnaǵa jetti. Al jyldyq 7,8 paiyz ósimmen 320,1 mln tonna júk tasymaldanǵan Qostanai oblysy úshinshi orynda tur.
Ótken jyldyń qańtar-jeltoqsanynda tasymaldanǵan júkterddiń basym bóligi, naqty aitqanda 3,6 mlrd tonnasy júk avtomobilderimen tasymaldanǵan. Bul 2018 jyldyń 12 aiymen salystyrǵanda 3,7 paiyzǵa kóp.
Temir jol kóligimen 1 jyldyń ishinde 408 mln tonna nemese jalpy júk tasymalynyń 9,6 paiyzy jetkizilip, 12 aida 2,5 paiyzǵa ósim kórsetti.
Al qalǵan kólik túrleri 279,6 mln tonna nemese jalpy júkterdiń 6,6 paiyzyn ǵana tasymaldaǵan. Bul rette 2018 jylǵy kórsetkish 283,7 mln tonna bolǵan edi. Al onyń 280,8 mln tonnasy qubyr jelisi arqyly tasymaldanǵan.
Kólik kásiporyndarynyń júk tasymalynan alǵan kiristeri 1 jyldyń ishinde 8,2 paiyzǵa artyp, 2,5 trln teńgege jetti. Bul kólik kiristeriniń jalpy kóleminiń 80,58 paiyzyn quraidy. Onyń ishinde 1,4 trln teńge qubyr jelisimen tasymaldaýdan túsken kiris. Júk tasymalynan túsken jalpy kiristiń 57,9 paiyzy osy qubyr jelisine tiesili bolyp tur.
