Senator Andrei Lýkin joldarda qaýipsizdikti qamtamasyz etý jumystaryn jaqsartý boiynsha birqatar usynystar jasady, dep habarlaidy "Ult aqparat".
«Salaǵa qatysty usynystardy aitqym keledi, olardyń birazy politsiia qyzmetkerleri tarapynan usynylǵan edi. Osy oraida bul másele jeke adamdardyń jol erejesin júieli túrde buzǵany úshin jaýapkershilik taqyrybyna arnalyp otyr. Olar jyl ishinde úsh jáne odan da kóp márte ereje buza otyryp, kólik basqarady», - dedi A. Lýkin elordadaǵy Politsiia departamentiniń ujymymen kezdesý barysynda.
Depýtat qazirgi kezde osy tektes ereje buzýshylyqtar úshin bir jylǵa júrgizýshi kýáliginen aiyrý jazasy qarastyrylǵanyn atap ótti.
«Jol erejesin buzǵany úshin ball esepteý júiesin ázirlep, engizýge qatysty tiisti usynys jasalýda. Onyń ishinde «Sergekpen» tirkelgen faktilerdi de qamtý jaǵdaiy aitylýda», - dedi senator.
Bul turǵyda ol osyndai júiede jazalaý sharalary limitten asyp ketkende iske asyrylatynyn atap ótti.
Sóz sońynda depýtat bul máselelerdi barlyq múddeli taraptarmen jáne qoǵamdastyqpen egjei-tegjeili talqylaý kerektigin aitty.
