Qaraǵandy oblysynda kúl qaldyǵy tómen joǵary sapaly kómir óndirile bastaidy, dep habarlaidy QazAqparat.
Innovatsiialyq jobany «Qaz Carbon» JShS iske asyrýǵa kiristi. Investorlar kómir baiytatyn jańa fabrika Qazaqstanda teńdesi joq nysan bolatynyna senimdi. Qazirgi zamanǵy óndiristik obektini 2021 jylǵa qarai qosý josparlanyp otyr.
Qurylys jospary týraly búgin ótken brifingte kompaniia aktsionerleri Erlan Nyǵmatýlin, David Kemertelidze jáne «Qazaqstannyń Damý Banki» AQ-nyń (QDB) basqarma tóraǵasy Abai Sarqulov aityp berdi.
Kómirdi baiytý fabrikasy QDB-nyń qarjylyq qoldaýymen salyna bastady. Biznesmenderge 7 jyl merzimge 9 mlrd 24 mln teńge kóleminde nesie jelisi ashylady. Jobanyń jalpy quny 12 mlrd teńgeni quraidy. Búginde jeke qarajat jáne investitsiialar esebinen 3 mlrd teńge qarjylandyryldy. QDB kompaniiaǵa QR indýstriialyq-innovatsiialyq damýynyń 2020-2025 jyldarǵa arnalǵan memlekettik baǵdarlamasy sheńberinde qaryz qarajatyn usynady.
Jańa kásiporynnyń artyqshylyǵy – ol qorshaǵan ortaǵa ziian keltirmei, sapaly kómir óndiretindiginde. Baiytý protsesi sýdy aǵartý basseinderi úshin kóp aýdan qajet etpeitin jabyq bólmede ótedi. Avtomatika men elektronikanyń jańa tehnologiialarynyń arqasynda óndiristiń barlyq kezeńderin kásiporynnyń basqarý ortalyǵynan operator baqylaidy. Joba qazirdiń ózinde «Qorshaǵan ortaǵa áserdi baǵalaý (QOÁB)» memlekettik ekologiialyq saraptamasynan ótti.
«Kómirdi baiytý úshin ylǵaldy baiytý tehnologiiasy qoldanylady. Ol paidaly qazbalardy shikizattyń jalpy taý-ken massasynan barynsha ajyratyp alýǵa múmkindik beredi. Baiytýdyń barlyq rásimi himiialyq reagentterdi qoldanbai jabyq tsiklde ótedi, bul qorshaǵan ortaǵa áser etýdiń tazalyǵyna alyp keledi jáne jalpy jobanyń ekologiialylyǵyn edáýir arttyrady. Baiytý fabrikasyndaǵy óndiristik protsesterdi avtomattandyrýdyń joǵary deńgeii daiyn ónimniń sapasy men tehnologiiasynyń saqtalýyn baqylaýǵa múmkindik beredi. Fabrikanyń qýattylyǵy saǵatyna 300 tonna nemese jylyna 1 800 000 tonna bolady», - dedi Qaz Carbon JShS aktsioneri Erlan Nyǵmatýlin.
Bolashaq zaýyt úshin shikizat retnde Qaraǵandy óńiriniń kómiri qolanylady.
Daiyn ónimdi eksportqa jiberý, sondai-aq Qaraǵandy ferroqorytpa zaýytynda - YDD Corporation JShS-de paidalaný josparlanýda.
«Biz búgin Qazaqstanda iri investitsiialyq jobalardy iske asyrýdyń jetkilikti tájiribesine ie boldyq. Sondyqtan, taiaý jáne alys shetel naryǵynyń qajettiligin, sondai-aq ishki naryqty zerttei otyryp, jańa jobalardy iske asyrýǵa kiristik. Is júzinde Qazaqstannyń bIregei investitsiialyq klimaty ǵana emes, qosylǵan quny joǵary ónim jasaý úshin úlken shikizat bazasy bar ekenine kóz jetkizdik», - dep atap ótti «Qaz Carbon» JShS aktsioneri David Kemertelidze.
«Qazaqstannyń Damý Banki» AQ basqarma tóraǵasy Abai Sarqulov bul jobany iske asyrý Memleket basshysynyń investitsiia tartý, óńdeý ónerkásibindegi eńbek ónimdiligin arttyrý jónindegi tikelei tapsyrmasynyń oryndalýyna yqpal etetinin aitty. Jańa fabrika 110 jańa turaqty jumys ornyn ashýǵa múmkindik beredi jáne qurylys kezeńinde 500-den astam adam tartylady. Sondai-aq, zaýyt óz ónimderin eksporttaityn bolady, bul elimizdiń eksporttyq áleýetin damytýǵa úles qosýǵa múmkindik beredi.
Qarjylandyrýdyń ekinshi bóligi qoldanystaǵy quiý óndirisin jańǵyrtý úshin paidalanylatyn bolady. Joba bolat jáne shoiyn ónimderin shyǵarý boiynsha qoldanystaǵy qýattardy ulǵaitýǵa baǵyttalǵan. Aita ketý kerek, 2018 jyly jańa investorlardyń, sonyń ishinde sheteldik investorlardyń kelýimen zaýytty aýqymdy jańǵyrtý bastaldy.
Zaýyt qyzmetiniń negizgi túrleri shoiyn jáne bolat ónimderin óndirý, koks jáne jartylai koks óndirý bolyp tabylady. Jalpy, kásiporyn 900-den astam bolat jáne shoiyn ónimderin shyǵarady. Jumys istep turǵan zaýyttyń jyldyq jobalyq qýaty 120 myń tonna shoiyn jáne bolat ónimderin quraidy.
Nátijesinde eki jyl ishinde zaýytty jańǵyrtý boiynsha belsendi jumys barysynda investorlar qazirdiń ózinde 8 mlrd. teńgeden astam jeke investitsiia saldy. 1 216 jumys orny quryldy. Kompaniianyń ortasha jalaqysy 245 myń teńgeni quraidy. 2019 jyly memleketke 2,1 mlrd teńge somasynda salyq tólendi. Qaz Carbon JShS jańa jobalardy iske asyrý aimaq ekonomikasyn ártaraptandyrýǵa jáne sońǵy býyn tehnologiialar transferti esebinen eńbek ónimdiligin arttyrýǵa aitarlyqtai serpin beredi.
