Bilim jáne ǵylym ministri Ashat Aimaǵambetov Qazaqstandaǵy joǵary oqý oryndary oqytýshylarynyń jalaqysy kóteriletinin aitty, dep habarlaidy "Ult aqparat" vedomstvonyń baspasóz qyzmetine silteme jasap.
Ashat Aimaǵambetov BǴM-de ótken apparattyq keńeste joǵary oqý oryndary oqytýshylarynyń jalaqysynyń tómendigin aitty. Jáne bilim granttary qunynyń artýy nátijesinde professorlyq-oqytýshylyq quramynyń eńbekaqysynyń artatyny týraly málimdedi.
«JOO oqytýshylarynyń jalaqysy tómen. Sondyqtan, Memleket basshysy alǵa qoiǵan mindetterge sáikes 2020-2025 jyldarǵa arnalǵan bilim men ǵylymdy damytýdyń memlekettik baǵdarlamasy sheńberinde memlekettik granttardyń quny osy jyldyń qyrkúieginen bastap ulǵaitylatyn bolady. Bul qandai nátije beredi? Ol oqytýshylardyń jalaqysyn kóterýge múmkindik beretin bolady», - dedi ministr.
Ashat Aimaǵambetov ýniversitet basshylaryna ártúrli forýmdar men tiimsiz is-sharalarǵa jumsalatyn shyǵyndardy azaitýdy tapsyrdy. Sondai-aq, jalaqy máselesi boiynsha tiisti jumystardy júrgizý kerektigin eskertti.
Ministr QR BǴM Joǵary jáne joǵary oqý ornynan keiingi bilim departamenti direktoryna ýniversitet basshylarynyń shtaty men oqytýshylardyń jalaqy máselesin qaita qaraýdy tapsyrdy.
Joǵary oqý oryndarynyń basshylary da tiisti tapsyrmalardy aldy.
«Memlekettik ýniversitetter tiimsiz shyǵyndardy qaita qaraýy tiis. Ártúrli tiimsiz forýmdardy, sharalardy qysqartý kerek. Prezident qańtar aiynda Úkimettiń keńeitilgen otyrysynda osyndai tapsyrma bergen bolatyn. Ol tek ministrliktiń apparatyna qatysty emes, kvazimemlekettik mekemelerge de qatysty másele», - dedi Ashat Qanatuly.
Esterińizge sala keteiik, buǵan deiin QR BǴM joǵary oqý oryndarynyń professorlyq-oqytýshylyq quramynyń jalaqysyn arttyrý týraly tapsyrmasy aiasynda oqý jylynyń basynan bastap bilim jáne ǵylym ministrligine qarasty 25 JOO-da jalaqy 20-dan 50%-ǵa deiin arttyryldy.
