Jańa kásipter atlasy jańa 239, transformatsiialanatyn 95 jáne joǵalyp bara jatqan 129 mamandyqty anyqtady. Bul týraly Eńbek jáne halyqty áleýmettik qorǵaý ministrliginiń baspasóz qyzmeti habarlady.
Eńbek jáne halyqty áleýmettik qorǵaý ministrligi jańa kásipter men quzyretterdiń atlasy ekonomikanyń negizgi 9 salasyn qamtitynyn, jańa, transformatsiialanatyn, sondai-aq joiylyp bara jatqan kásipter men quzyretterdi biriktiretinin habarlaidy. Bul azamattarǵa mamandyqty durys tańdaýǵa, oqý josparlaryn ózektendirýde kásibi baǵdar berýge kómektesedi. Eńbek naryǵynda suranysqa ie «jańa kásipter men quzyretterdiń atlasy» jobasyn iske asyrý úshin byltyr Eńbek jáne halyqty áleýmettik qorǵaý ministrligi, QR Bilim jáne ǵylym ministrligi jáne «Eýraziialyq top» JShS arasynda ózara yntymaqtastyq týraly memorandým jasalǵan. Atlastyń negizgi maqsaty – qazirgi mamandyqtardy taldaý, ózgerip jáne joiylyp bara jatqan mamandyqtardy eskere otyryp, ózekti bolatyn nemese taiaýdaǵy onjyldyqta paida bolatyn eńbek naryǵynyń bolashaq trendterin, mamandyqtar men daǵdylardy aiqyndaý.
«Eńbek ministrligi Dúniejúzilik banktiń «Eńbek daǵdylaryn damytý jáne jumys oryndaryn yntalandyrý» jobasy sheńberinde 8 salany (munai-gaz, aýyl sharýashylyǵy, kólik jáne logistika, mashina jasaý, aqparattyq-kommýnikatsiialyq tehnologiialar, energetika, týrizm, qurylys salalary) qamtydy. Al taý-ken-metallýrgiia salasyn zertteýdi «Eýraziialyq Top» JShS óz betinshe júzege asyrdy. Atlasty ázirleý ádistemesi halyqaralyq tájiribege jáne ekonomika salalaryn damytýdyń álemdik trendterine negizdelgen. Ol salalyq sarapshylar retinde óndiris, memlekettik organdar, salalyq qaýymdastyqtar ókilderiniń qatysýymen rapid forsait (rapid foresight) tehnologiiasy boiynsha pándik tereń zerdeleýmen boljamdy sessiialar ótkizýdi qamtydy», - delingen ministrliktiń habarlamasynda.
Aýqymdy zertteýlerdiń qorytyndysy boiynsha jańa 239, transformatsiialanatyn 95 jáne joǵalyp bara jatqan 129 mamandyq anyqtalǵan. Atlasta aiqyndalǵan jańa mamandyqtar bolashaqta jańa tehnologiialardyń engizilýine sáikes qandai quzyretter men qyzmetkerler suranysqa ie bolatynyn túsinýge múmkindik beredi.
Atlastyń nátijesin yńǵaily paidalaný úshin «Elektrondyq eńbek birjasy» portalynyń interaktivti ishki modýlinde elektrondyq silteme, sondai-aq IOS jáne ANDROID platformalaryna arnalǵan Atlastyń mobildi qosymshasy ázirlengen.
