Qazaqstan Prezidenti Qasym-Jomart Toqaev Naýryz merekesine arnalǵan sharalardy jáne áskeri paradty ótkizbeý jóninde tapsyrma berdi, dep habarlaidy "Ult aqparat".
"Memleket basshysy elimizde koronavirýstyń taralýyna jol bermeýge bailanysty Naýryz merekesine arnalǵan qoǵamdyq sharalardy jáne elordada Jeńistiń 75 jyldyǵyna arnalǵan áskeri paradty ótkizbeý týraly sheshim qabyldady", - dep atap ótti Prezidenttiń baspasóz hatshysy Berik Ýáli.
Sonymen qatar Toqaev buǵan deiin josparlanǵan halyqaralyq forýmdardy keiinge shegerýdi tapsyrdy.
"Degenmen shaǵyn jáne orta biznes jumysyn jalǵastyra berýi tiis. Qasym-Jomart Kemeluly shekteý sharalary olardyń jumysyna kedergi keltirmeýi kerek ekenin atap aitty. Iri kásiporyndar da úzdiksiz jumys istei beredi", - dep túsindirdi Berik Ýáli.
Aita keteiik, búgin Prezident koronavirýs pandemiiasyna qarsy kúres máselesi jóninde birqatar memlekettik organ basshysymen shuǵyl keńes ótkizdi. Jaǵdai Memleket basshysynyń udaiy baqylaýynda.
Aita keteiik, Covid-19 dep atalatyn jańa koronavirýs 2019 jyldyń jeltoqsanynda tarala bastady. Qytaidyń Ýhan qalasynda (Hýbei provintsiiasy) buryn-sońdy belgisiz bolǵan aýrý órshidi. Qazir koronavirýs álemniń 100-den astam elinde anyqtaldy.
Qazaqstanda ázirge koronavirýs tirkelgen joq. Alaida bas sanitar 11-16 naýryz aralyǵynda elge koronavirýs kirýi múmkin ekenin eskertken bolatyn.
