Foto: pexels.com
Qazaqstanda jemqor sheneýnikterden tárkilengen qarajat somasy ataldy. Bul týraly Sybailas jemqorlyqqa qarsy is-qimyl agenttiginiń tóraǵasy Ashat Jumaǵali prezident Qasym-Jomart Toqaevqa bergen esebinde aitty.
Aqorda málimetinshe, Qasym-Jomart Toqaevqa joǵary laýazymdy tulǵalardyń qatysy bar qylmystardyń jolyn kesý jumystary jalǵasyp jatqany jóninde málimet berildi.
Ashat Jumaǵalidiń aitýynsha, vedomstvo 2022 jyldan bastap memleket pen kvazimemlekettik sektor sýbektilerine 1 trillion 90 milliard teńge somasynda múliktik aktivter men qarajattyń qaitarylýyn qamtamasyz etken. Bilim berý infraqurylymyn qoldaý qoryna 153,3 milliard teńge aýdarylǵan. Osy qarjyǵa qazirdiń ózinde 50-den astam mektep ashylǵan. Sondai-aq taǵy 30 bilim oshaǵyn salý josparlanǵan.
Memleket basshysyna buǵan deiin bergen tapsyrmalarynyń oryndalý barysy týraly baiandaldy.
Atap aitqanda, Agenttik Ulttyq bankpen jáne Qarjy ministrligimen birlesip, "Tsifrlyq teńge" platformasy arqyly júzege asyratyn "aqshany boiaý" jobasyn iske qosty. Ashat Jumaǵali prezident Joldaýynda júktegen mindetterge sai jol qurylysy men aýyl sharýashylyǵy salalarynda sybailas jemqorlyqty joiý jumystary júrgizilip jatqanyn aitty.
Sonymen qatar "Jaily mektep" ulttyq jobasyna monitoring jasalyp jatyr. Tekserý barysynda qarajatty tiimsiz paidalanýǵa jáne nysandardy tapsyrý ýaqytyn keshiktirýge sebep bolatyn sybailas jemqorlyq táýekelderi taldanady.
Budan bólek, Qasym-Jomart Toqaevqa pedagogterdiń eńbekaqy qorynan milliardtaǵan qarjy jymqyrýǵa jol bergen sybailas jemqorlyq faktorlaryn joiý sharalary týraly aityldy. Biyl Agenttiktiń bastamasymen biýdjet protsesterin avtomattandyrýǵa, Qazynashylyqty bilim berý mekemeleriniń esep júielerimen integratsiialaýǵa, tólem qujattaryna qol qoiý kezinde biometriiany paidalanýǵa baǵyttalǵan tsifrlyq sheshimder engizildi.
Prezidentke halyqaralyq qatynastar, kadr saiasaty, normativtik-quqyqtyq aktiler ázirleý protsesi sekildi vedomstvonyń basqa da basty baǵyttary boiynsha atqarylǵan jumystar týraly aqparat berildi.
Kezdesý sońynda memleket basshysy elimizdegi sybailas jemqorlyqpen kúresti kúsheitý jóninde birqatar tapsyrma berdi.
