Qazaqstanda koronavirýs indetinen qorǵaityn jeke qorǵanys quraldary qanshalyqty jetkilikti? Bul suraqqa Dárilik zattardy, meditsinalyq buiymdardy jáne tehnikany saraptaý ulttyq ortalyǵynyń bas direktory Arnur Nurtaev jaýap berdi, dep habarlaidy QazAqparat.
«Qazir bárine jeke qaýipsizdik quraldary jetkilikti me, joq pa – aitý qiyn. Defitsit qashan da baiqalady. Ásirese maska boiynsha... Alaida qazirgi ýaqytta otandyq kásiporyndardan aqýymdy kólemde olar satylyp alynyp jatyr. Otandyq óndirýshiler qazirgi kúrdeli ahýalǵa bailanysty óndiristik qýattylyǵyn arttyryp keledi. Oǵan qosa jeke qaýipsizdik quraldary, maskalar Qytaidan kóptep satyp alynyp, elge jetkizilýde. Ótkir defitsit bar dep aitýǵa kelmeidi. Áitse de árine qajettilik bar», - Arnur Nurtaev Densaýlyq saqtaý ministrliginiń Facebook paraqshasynda sóilegen sózinde .
Onyń aitýynsha meditsinalyq uiymdar qazir naryqtaǵy kózderden, ózge óndirýshilerden satyp alyp, qajettiligin jaýyp otyr. Al otandyq kásiporyndar qajettilikti jabý úshin táýligine úsh aýysym boiy jumys isteýde. Arnur Nurtaev meditsinalyq uiymdar boiynsha jeke qaýipsizdik quraldary qandai mehanizmmen bólinip, taratylatynyn da jetkizdi.
«Árbir meditsinalyq uiymnyń beretin óz tapsyrysy bar. Bul ótinimderdi Biryńǵai distribiýtor maquldaidy. Bári ortalyqtandyrylǵan tártipte júrgiziledi. Eger Biryńǵavi distribiýtor qajetti kólemdi ýaqytynda jetkize almasa meditsinalyq uiymdar ony naryqtan ózderi satyp ala bastaidy. Báribir de importtyń baryn atap ótý kerek», - dedi ol.
Arnur Nurtaevtyń aitýynsha, eger kúzde koronavirýs epidemiiasy qaitadan órship ketse otandyq óndirýshilerdiń bári jeke qaýipsizdik quraldaryn barynsha óndirý boiynsha baǵdarlamany ázirleidi.
