Qazaqstanda áýe shabýylyna qarsy qorǵanys áskerleri men áskeri-áýe kúshteri bólimderi men bólimsheleriniń «Jaýyngerlik dostastyq - 2019» oqý-jattyǵýy bastaldy, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Atalmysh sharaǵa Qazaqstan, Qyrǵyzstan jáne Resei elderinen áýe shabýylyna qarsy qorǵanys áskerleriniń jaýyngerlik esepteri, sondai-aq áskeri aviatsiia qatysady.
Qazaqstan Qarýly kúshteriniń atynan Áýe qorǵanysy kúshteriniń barlyq áskeri bólimderi, áýe shabýylyna qarsy qorǵanys áskerleri men tehnika, Áskeri-áýe kúshteri jumyldyryldy. Tehnikalyq bólim S-200V, S-300PS, S-75, S-125, «Tekshe», «Sheńber» zenittik-zymyran keshenderin, Sý-30SM jańa joiǵyshtar, sonymen qatar MiG-31 jáne Sý-27, Sý-25, L-39 ushaqtaryn, Mi-35, Mi-171, Mi-17 tikushaqtaryn, qazaqstandyq óndiristen shyqqan ES-145 tikushaǵy men WinlongWL ushqyshsyz apparatyn usyndy.
Tájiribelik is-qimyldar Qazaqstanda «Saryshaǵan» jáne Reseide «Ashýlyq» áskeri poligondarynda ótedi.
Qazaqstandyq bólimshelerden basqa «Saryshaǵan» poligonynda «Jaýyngerlik dostastyq» oqý-jattyǵýyna Qyrǵyzstan Qarýly kúshteriniń S-75, S-125 zenittik zymyran keshenderiniń jaýyngerlik esepteri de qatysady.
Qazaqstan, Qyrǵyzstan jáne Resei memleketteriniń áýe shabýylyna qarsy qorǵanys áskerleriniń jaýyngerlik esepteýleri zenittik zymyran keshenderiniń túrli úlgilerinen tájiribelik atystardy oryndaidy. Aviatsiia basqarylatyn jáne basqarylmaityn aviatsiialyq zymyrandar men bombalardy, aviatsiialyq zaqymdaý quraldaryn jaýyngerlik maqsatta qoldana otyryp, kúndizgi jáne túngi ýaqytta ushý qimyldaryn júrgizedi.
Buǵan deiin Qazaqstannyń Áýe qorǵanysy kúshteri jaýyngerlik ázirliktiń joǵary dárejesine keltirildi. Áskeri bólimder marsh, oqý - jattyǵý ótkizý aýdanyna kóshirýdi oryndasa, aviatsiia – jedel aerodromdarǵa ushýdy júrgizdi. Qazirgi ýaqytta áýe shabýylyna qarsy qorǵanys pen aviatsiia áskerleri toptarynyń birlesken jaýyngerlik is-qimyldaryn júrgizý tásilderi pysyqtalýda.
