Halyqaralyq jasyl tehnologiialar jáne investitsiialyq jobalar ortalyǵy basqarma tóraǵasynyń orynbasary Maqsut Ábilqaiyrov jasyl ekonomikaǵa aýysý úshin qandai sharalar jasalyp jatqanyn aityp berdi, dep habarlaidy QazAqpara.
«Jyl saiyn Halyqaralyq jasyl tehnologiialar jáne investitsiialyq jobalar ortalyǵy jasyl tehnologiialardy engizý, jasyl investitsiialardy tartý taqyrybynda konferentsiia ótkizedi. Parij kelisimi aiasynda ár el ekologiiany, áleýmettik-ekonomikalyq jaǵdaidy jaqsartýǵa qajetti ekologiialyq normalar engizýi kerek. Qazaqstan jańa Ekologiialyq kodeks sheńberinde eń ozyq joǵary tehnologiialardy engizýge tyrysady. Eń ozyq qoljetimdi tehnologiialar qaǵidatyn engizý qajettigi týraly norma jazyldy. Biz Eýropalyq Odaqtyń, Resei Federatsiiasynyń, Ońtústik-Shyǵys Aziia elderiniń tájiribesin alamyz», - dedi Maqsut Ábilqaiyrov tilshilerge bergen suhbatynda.
Onyń aitýynsha, qazaqstandyq jáne halyqaralyq sarapshylar pýly jasyl ekonomikaǵa jáne eń ozyq qoljetimdi tehnologiialar qaǵidattaryna kóshý máselesin talqylap jatyr. Ár ónerkásip nysany óz baǵyty boiynsha jumys júrgizedi. Tehnologiialyq aýdit júrgizilgen soń, qandai tehnologiiany engizý kerektigi belgili bolady.
Sonymen birge, spiker OQT qaǵidatyn engizýdiń uzaq jáne aýqymdy protsess ekenin atap ótti. Halyqaralyq jasyl tehnologiialar jáne investitsiialyq jobalar ortalyǵy bul jumysty ótken jyldan beri júrgizip keledi.
«Qazirgi ýaqytta kez kelgen institýttan tartylatyn kez kelgen investitsiia ekologiiany, iaǵni qorshaǵan ortaǵa ziian keltirmeýdi qamtamasyz etýi kerek. Shetelden tartylǵan árbir dollar ekologiialyq baǵalaýdan ótýi kerek. Barlyq qarajat ekologiialyq normativterge sai bolýy tiis – energiialyq tiimdi bolyp, SO2 (kómirqyshqyl gazy) shyǵyndylaryn azaitýy tiis. Bul – bizdiń ortalyqtyń ekinshi baǵyty, biz oǵan jaýap beremiz. Aziia Damý Banki shaǵyn jáne orta biznesti qarjylandyrýǵa 80 mln dollardan astam qarajat tartý jóninde úlken jumys júrgizýde. Kelesi jyldan bastap shaǵyn, orta jáne mikrobiznesti qarjylandyrýǵa jasyl qarjy belsendi tartylatyn bolady. Iaǵni, jobany qarjylandyrýǵa qarajat tartylsa, kompaniia belgili bir talaptarǵa, mysaly, SO2 shyǵaryndylaryna baǵyttalǵan qaǵidalarǵa sai bolýy kerek. Eger kásiporyn jabdyq satyp alsa, ol energiialyq turǵyda tiimdi bolýy tiis», - dep túsindirdi M. Ábilqaiyrov.
Onyń aitýynsha, múddeli kásiporyndar QR Ekologiia, geologiia jáne tabiǵi resýrstar ministrligine, «Báiterek» ulttyq basqarýshy holdingine, «Damý» kásipkerlikti damytý qoryna júgine alady. Halyqaralyq jasyl tehnologiialar jáne investitsiialyq jobalar ortalyǵy da keńes berýge daiyn.
