Qazaqstanda jasy 1-den asqan balalarǵa da járdemaqy tóleý múmkinshiligi qarastyrylyp jatyr. Bul týraly búgin Úkimet úiinde ótken baspasóz máslihatynda QR Qarjy ministri Álihan Smaiylov aitty, dep habarlaidy QazAqparat.
Onyń aitýynsha, QR Úkimetiniń janynan qurylǵan azamattardyń tabysyn arttyrý, turmys sapasyn jaqsartý jáne kópbalaly otbasylarǵa qoldaý sharalaryn kúsheitý jónindegi jumys toby bala kútimine bailanysty járdemaqy tóleý merzimin ulǵaitý usynysyn qarastyrýda.
«Bul másele qazirgi ýaqytta jumys tobynda qarastyrylyp jatyr. Eń aldymen, bul, bala bir jasqa tolǵannan keiin de kómek kórsetý úshin jas shegin uzartýǵa, sonymen qatar járdemaqy kólemin arttyrýǵa qatysty. Mundai usynystardy engizemiz. Muny júzege asyrýǵa bolady jáne bul baǵytta jumys istep jatyrmyz», - dedi ministr.
Osy oraida ol balalary bar otbasylarǵa beriletin jerdemaqynyń qoldanystaǵy júiesine sáikes bala 1 jasqa tolǵanǵa deiin jórgekpul alatyndyǵyn aitty. Jáne onyń kólemi otbasydaǵy bala sanyna bailanysty teńgerimdi ekendigin eske saldy.
«2018 jyly 395 myń adam balany dúniege ákelgeni úshin 40,7 mlrd teńge járdemaqy aldy. Al balanyń bir jasqa deiingi kútimine bailanysty 125 myń adam 30 mlrd teńgege jýyq járdemaqyǵa ie boldy», - dedi ol.
Ministrdiń dereginshe, múdegek bala tárbielep otyrǵan 80,6 myń adamǵa 29,5 mlrd teńge járdemaqy berildi. Munan bólek, «Altyn alqa» men «Kúmis alqa» iegerlerine, kópbala analarǵa ai saiyn járdemaqy tólenedi. Ótken jyly mundai 271 myń otbasyna 33 mlrd teńge bólingen.
«Sondai-aq jumys isteitin áielderge júktiligine jáne bala týýyna bailanysty tabysynan aiyrylǵan jaǵdaida áleýmettik tólem tólenedi. Bizde ony 188 myń adam aldy, tólemniń ortasha kólemi 391 myń teńgeni qurady. Bir jasqa deiingi bala kútimimen 429 adam ainalysyp, tólem somasy 96 mlrd teńgeni qurady. Bul Memlekettik áleýmettik saqtandyrý qorynan tólengen sońǵy tólemder. 2018 jyldyń qorytyndysynda MÁSQ-ten 165 mlrd teńge tólendi. Sonymen qatar qoldaýdyń salyqtyq jeńildikter sekildi basqa da túrleri bar»,- dedi Á.Smaiylov.
Aita keteiik, QR Qarjy ministri Álihan Smaiylov Úkimet janynan qurylǵan jumys toby, sondai-aq kópbalaly otbasylardy baspanamen qamtý máselesin de qarastyryp jatqanyn málim etti.
