Foto: polisia.kz
Qazaqstanda jastardan quralǵan qylmystyq top músheleri ustaldy, - dep habarlaidy «Ult aqparat» Polisia.kz saityna silteme jasap.
IIM jastar arasyndaǵy kriminaldyq toptardy anyqtaý jáne jolyn kesý boiynsha jumysty turaqty negizde júrgizip keledi. Biyl qańtarda basqa da birqatar óńirde osyndai ustaýlar júrgizilgen.
"Máselen, Shymkentte jedel aqparatty tekserý barysynda ýniversitetterdiń birinen úsh stýdentti urlaý deregi anyqtaldy. Tekseris barysynda 20 jastaǵy alty jigit kriminalitet ókiliniń yqpalyna túsip, birneshe bopsalaý jáne ózge de qylmystar jasaǵany anyqtaldy. Bir epizodta olar úsh stýdentti avtokólikke otyrǵyzyp, qalanyń syrtyna aparǵan, onda olar kúsh kórsetip, mobildik qosymsha arqyly onlain-nesie resimdetken jáne 700 myń teńgeni tartyp alǵan. Toptyń barlyq qatysýshylary ustaldy", - delingen habarlamada.
Almaty oblysynda 23 jasqa deiingi úsh turǵynnan turatyn top ustaldy, olar 2005 jyly týǵan qyzben kelise otyryp, adamdardy aldap páterge aparyp otyrǵan. Onda olar jábirlenýshilerdi kúsh kórsetemiz dep qorqytyp, aqsha bopsalaǵan. Kúdiktiler ustalyp, sottyń sanktsiiasymen qamaýǵa alyndy.
Pavlodar oblysynyń Aqsý qalasynda bopsalaý jáne alaiaqtyq qylmystar jasaǵany úshin jastar toby ustaldy, onyń qatysýshylary qorqytý jáne aldaý arqyly jábirlenýshilerdi nesie resimdeýge májbúrlegen, keiinnen aqsha men taýarlardy iemdengen. Kúdiktiler ustalyp, qamaýǵa alyndy.
"Aqmola oblysynda jastar tobynyń eki múshesi buryn jergilikti turǵynnan jarty million teńge bopsalaǵany anyqtaldy. Kúdiktilerdiń biri 2005 jyly týǵan jáne uqsas qylmystar jasaǵany úshin jazasyn ótep jatyr. Ekinshi kúdikti qamaýǵa alynyp, tergeý júrgizilip jatyr.
Abai oblysynda stýdentterdi qorqytý arqyly aqsha bopsalaýmen ainalysqan semeilik jas turǵyndardan quralǵan toptyń qylmystyq áreketi anyqtaldy. Jábirlenýshilerdiń biri – jergilikti úniversitettiń ekinshi kýrs stýdenti, byltyr tamyzdan bastap qaskóilerge 700 myńnan astam teńge bergen. Kúdikti qamaýǵa alyndy.
Atyraýda jastar tobynyń múshesine qatysty jedel aqparatty tekserý nátijeleri boiynsha eki sholaq myltyq jáne ártúrli kalibrli 60 patron tárkilendi. Ol 2005 jyly týǵan kolledj stýdenti", – dedi QR IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
Jastar arasyndaǵy qylmystyń aldyn alý Ishki ister ministrligi basshylyǵynyń erekshe baqylaýynda tur.
