Toqyma buiymdaryn óndirý boiynsha keshendi jospar qurylýy kerek. Bul týraly Májilistiń jalpy otyrysynda depýtat Ǵani Tashqaraev málim etti, dep habarlaidy QazAqparat.
«Meniń depýtattyq saýalym toqyma ónerkásibine qatysty bolyp otyr. 2020 jyldyń qorytyndysy boiynsha, toqyma ónerkásibi jeńil ónerkásiptegi óndiris kóleminiń 55 paiyzdan astamyn nemese 71 mlrd teńgeni qurady. Al jeńil ónerkásiptegi óndiris kólemi 128 mlrd teńge boldy. Jalpy alǵanda, jeńil ónerkásip respýblikadaǵy óńdeýshi ónerkásiptiń 1 paiyzyn jáne jalpy ishki ónimniń qurylymynda 0,1 paiyzdy qurady. Kórshi memleket - Ózbekstandy alatyn bolsaq, atalǵan kezeńde jeńil ónerkásiptiń úlesi 15,2 paiyz bolǵan. Ózbekstanda bul salada jumysshylardyń 28 paiyzǵa jýyǵy shoǵyrlanǵan. Elimizdegi toqyma buiymdary óndirisiniń negizgi úlesi - Shymkent qalasyna (25%) jáne Túrkistan oblysyna (31%) tiesili. Toqyma ónerkásibi halyqty, ásirese áielderdi jumyspen qamtýǵa múmkindik beretin áleýmettik mańyzy bar sala ekenin eskersek, onda osy salanyń damýyna tiisinshe qoldaý kórsetýimiz qajet. Osyndai usynystar jergilikti halyq pen kásipkerler tarapynan óńirlerge barǵan issaparymyz kezinde jii kóterilgen máselelerdiń biri boldy», - dedi Ǵani Tashqaraev Indýstriia jáne infraqurylymdyq damý ministri Qaiyrbek Óskenbaevtyń atyna joldaǵan saýalynda.
Osy oraida ol toqyma ónerkásibiniń jumysshylarymen bolǵan kezdesý barysynda birqatar ózekti máseleler kóterilgenin aitty.
Sonyń nátijesinde toqyma ónerkásibi kásiporyndaryn qazirgidei qiyn kezeńde qoldaý maqsatynda tiisti usynystar ázirlendi.
«Shetel valiýtasynyń turaqsyzdyǵyna bailanysty shikizat qunynyń qymbattaýy saldarynan memlekettik tapsyrysty ýaqtyly oryndai almaǵan mekemelerdi abyroisyz kásipkerler tizilimine engizýge moratorii jariialansyn. Ekinshiden, jumys pen tapsyrystardyń bolmaýy, salyqtyń tólenbeýi siiaqty turaqsyzdyq kezinde shottardy buǵattaýǵa moratorii engizilsin. Sheteldik toqyma buiymdarynyń otandyq ónimnen aitarlyqtai arzan baǵamen ákelinýine jol bermes úshin shekarada baqylaýdy kúsheitip, otandyq toqyma buiymdaryn óndirýshilerge qoldaý kórsetilsin», - dedi depýtat.
Onyń paiymynsha, toqyma buiymdaryn óndirý boiynsha keshendi jospar qurylýy kerek.
Ónim óndirýshilerge óndiris kólemin ulǵaitýǵa, jumysshylardy qaita daiarlaý men oqytýǵa qosymsha sýbsidiia bólingeni mańyzdy.
«Ishki naryqta taýarlardy jarnamalaýǵa kómek kórsetilýi kerek. «Samuryq-Qazyna» qorynda toqyma buiymdaryna qatysty tenderde qoldanylatyn reseilik standarttardyń ornyna jalpy memlekettik standarttar ázirlenýi tiis», - dedi Ǵani Tashqaraev.
