2020 jyldyń 12-13 qyrkúieginde Qazaqstanda jas otbasylardyń alǵashqy aýqymdy onlain-festivali ótedi. Bul jaiynda «Azamattyq bastamalardy qoldaý ortalyǵy» basqarma basshysy Bátima Mýkina Facebook paraqshasynda jazdy, dep habarlaidy "Ult aqparat".
«Qoǵamnyń turaqtylyǵy otbasynyń ál-aýqatyna bailanysty. Degenmen, otbasynyń jaǵdaiy da áleýmettik protsestermen bailanysty ekendigi sózsiz. Bizdiń memleket otbasyna qatysty áleýmettik máselelerge kóp kóńil bóledi. Memleket basshysy Qazaqstan halqyna Joldaýynda azamattardyń áleýmettik ál-aýqatyn arttyrýǵa, onyń ishinde densaýlyq saqtaý, bilim berý, balalardyń quqyqtaryn qorǵaý máselelerin sheshýge erekshe nazar aýdardy. Azamattyq bastamalardy qoldaý ortalyǵy osyndai áleýmettik jobalardy júzege asyrý úshin granttyq qoldaý kórsetedi. Biz memleket, ÚEU men azamattar arasynda ózara tiimdi qarym-qatynas ornatý úshin óz tarapymyzdan bar kúsh-jigerimizdi salamyz. Iske asyrylyp jatqan jobalardyń aitarlyqtai paida ákelýi men naqty áleýmettik máselelerdi sheshý biz úshin óte mańyzdy», - dedi ol.
Onyń atap ótýinshe, 2020 jyldyń 12-13 qyrkúieginde Qazaqstanda jas otbasylardyń alǵashqy aýqymdy onlain-festivali ótedi. Oǵan elimizdiń burysh-buryshynan 29 jasqa deiingi erli-zaiyptylar qatysa alady.
«Festival QR Aqparat jáne qoǵamdyq damý ministrliginiń qoldaýymen ótkiziledi. Azamattyq bastamalardy qoldaý ortalyǵynyń memlekettik grant iegeri «Qazaqstannyń teń quqyqtary men teń múmkindikteri institýty« QQ is-sharany «Jastar arasynda otbasylyq qundylyqtardy nyǵaitý boiynsha is-sharalar kesheni« aiasynda uiymdastyrýda. Festival 14 óńirde jáne respýblikalyq mańyzy bar 3 qalada ótedi», - dedi ol.
Basqarma tóraiymynyń aitýynsha, festivaldiń maqsaty - jastar arasynda otbasy jáne otbasylyq qundylyqtar institýtyn nyǵaitýǵa yqpal etý.
«Óitkeni, aqyly kýrstarǵa barýǵa nemese mamandardyń kómegine júginýge kez kelgen jas otbasynyń shamasy jete bermeidi. Festival aiasynda jetekshi sarapshylardyń qyzyqty seminarlary men master-klastary ótkiziledi, estrada ártisteriniń onlain-qoiylymdary men konkýrstar uiymdastyrylady, baǵaly syilyqtar taratylady. Tolyq aqparatty @otaufest_kazakhstan paraqshasynan taba alasyzdar. Biz qoǵamnyń áleýmettik máselelerin sheshýge úles qosýǵa tyrysýdamyz. Eger is-shara birneshe otbasyn jaqyndastyrsa, munyń ózi úlken jetistik bolar edi», - dedi Bátima Mýkina.
