Foto: primeminister.kz
Astanada QR Premer-Ministri Álihan Smaiylovtyń tóraǵalyǵymen ortalyq memlekettik organdardyń basshylary jáne diplomatiialyq korpýs ókilderiniń qatysýymen «Qazaqstan-Eýroodaq» dialog platformasynyń 12-shi otyrysy ótti, dep habarlaidy "Ult aqparat" primeminister.kz saityna silteme jasap.
Úkimet basshysy óz sózinde Eýropalyq Odaqpen áriptestikti keńeitý Qazaqstannyń basymdyqtarynyń biri ekenin atap ótti. Respýblika saýda-ekonomikalyq jáne investitsiialyq yntymaqtastyqty odan ári tereńdetý úshin qolda bar múmkindikterdi paidalanýǵa múddeli. Atap aitqanda, mundaǵy perspektivalyq baǵyttar – «jasyl ekonomikaǵa» kóshý jáne ózara kóliktik bailanysty nyǵaitý.
Premer-Ministr ekologiialyq kún tártibi Qazaqstan ekonomikasynyń ornyqty damýynda negizgi basymdyqtardyń biri ekenin atap ótti. Máselen, 2030 jylǵa qarai elimiz óziniń energiia teńgerimindegi jańartylatyn energiia kózderiniń úlesin aǵymdaǵy 4,5%-dan 15%-ǵa deiin arttyrýdy josparlap otyr.
«Eýropa elderiniń balamaly energiia salasyndaǵy tájiribesi men jetistikterin eskere otyryp, biz birlesken jańa jobalardy iske asyrýǵa múddelimiz», — dedi Álihan Smaiylov.
Ol Turaqty shikizattyń, akkýmýliatorlyq batareialardyń jáne jasyl sýteginiń qunyn qurý tizbegi salasyndaǵy strategiialyq áriptestik týraly ózara túsinistik memorandým osy baǵyttaǵy mańyzdy oqiǵa bolǵanyn aitty. Bul rette osy saladaǵy seriktestik qazirdiń ózinde naqty qadamdarmen nyǵaitylýda. Atap aitqanda, 21 maýsymda Mańǵystaý oblysynda «jasyl» sýtegin óndirý boiynsha Svevind kompaniiasynyń iri jobasy iske qosyldy.
Premer-Ministr sondai-aq tranzittik-kólik yntymaqtastyǵy salasynda Transkaspii halyqaralyq kólik baǵytynyń (THKB) róli artyp kele jatqanyn atap ótti. Búginde Qazaqstan marshrýttyń basqa qatysýshylarymen birlesip Orta dálizdegi «tar jerlerdi» sinhrondy joiý boiynsha belsendi jumys júrgizip otyr. Sonymen qatar respýblika Orta dálizdi Transeýropalyq kólik jelisimen jáne Global Gateway bastamasymen ushtastyrý boiynsha eýropalyq seriktestermen birlesip jumys isteýge daiyn.
«Jalpy Qazaqstan men Eýroodaqtyń “jasyl” ekonomika, kólik jáne logistika salalaryndaǵy áriptestikti odan ári tereńdetý boiynsha múmkindikteri kóp», — dedi Álihan Smaiylov.
Sonymen qatar Úkimet basshysy eýropalyq áriptesterine Ázerbaijan men Grýziiaǵa resmi sapary aiasynda kelisilgen THKB-ny damytý jónindegi ýaǵdalastyqtar men qol qoiylǵan kelisimder týraly egjei-tegjeili aityp berdi.
EO-nyń Qazaqstandaǵy elshisi Kestýtis Iankaýskas Eýroodaq pen Qazaqstan arasyndaǵy qarym-qatynastar jaqsy qarqynmen damyp kele jatqanyn, bul rette jańartylatyn energiia kózderi salasyndaǵy jańa jobalardy iske asyrý jáne ózara kólik bailanysyn nyǵaitý aldaǵy birlesken jumystyń negizgi baǵyttarynyń biri ekenin atap ótti.
«Klimattyń ózgerýi jahandyq qaýip bolyp otyr. Eýropalyq Odaq 2050 jylǵa qarai nóldik ziiandy qaldyqtar ekonomikasyna kóshý jónindegi mindettemesi týraly birneshe ret jariialaǵan bolatyn. Biz Qazaqstandy osy baǵytta kompaniialarymyz men bankterimizdiń naqty jobalary arqyly qoldaǵymyz keledi», — dedi Kestýtis Iankaýskas.
Odan bólek Odaqtyń elimizdegi elshisi kólik infraqurylymyn damytý jáne Orta dáliz arqyly júk tasymaldaýdy arttyrý úshin logistikalyq úderisterdi ońtailandyrý jónindegi óńirlik bastamalardy joǵary baǵalady.
Otyrys barysynda logistika jáne kólik salasyndaǵy ózekti máseleler, onyń ishinde ákimshilik jáne infraqurylymdyq kedergilerdi joiý, JEK-ti damytý, ekologiialyq taza otyn túrlerine kóshý jáne basqa da birqatar másele jan-jaqty talqylandy.
Sharaǵa Finliandiia men Rýmyniianyń Qazaqstandaǵy elshileri, Globalia LTD, Deutsche Bahn jáne Scania Central Asia LLP kompaniialarynyń ókilderi qatysty. Atalǵan máseleler boiynsha respýblikanyń ortalyq memlekettik organdary men ulttyq kompaniialarynyń basshylary oi-pikirlerin ortaǵa saldy.
