Búgin Energetika ministrligi BAQ ókilderine arnaiy baspasóz týryn ótkizip, elordadaǵy janar-jaǵarmai beketterindegi benzin sapasyn tekserý protsesin tanystyrdy, dep habarlaidy QazAqparat tilshisi.
Baspasóz týryna qatysýshylar Uly dala dańǵyly boiyndaǵy Esil aýdandyq sotynyń janynda turǵan janar-jaǵarmai beketinde boldy. Munai ónimderiniń sapasyn baqylaityn mamandar beketten synama alyp, ony tekserý úshin laboratoriiaǵa jiberdi.
«Munai óniminiń ózi ainalyp kelgende totyǵýǵa beiim, durys saqtalmasa sapa kórsetkishin joǵaltyp alatyn kúrdeli himiialyq taýar. Mine, mundai qiyndyqqa urynbaý úshin bizdiń kompaniia munai ónimderiniń sapasyn túpkilikti baqylaý júiesin engizdi», - dedi «PetroRetail» JShS munai ónimderiniń sapasyn baqylaý bóliminiń bastyǵy Aqylbek Sýhanberdiev tilshilerge bergen suhbatynda.
Onyń aitýynsha, benzinniń sapasy zaýyttan shyqqannan bastap, saqtaý, jetkizý jáne satý kezeńine deiin únemi tekserilip otyrady.
«Bizdiń kompaniia otandyq úsh munai-óńdeý zaýytynyń ónimderin satady. Barlyq otandyq zaýyt jańartylǵannan keiin olarda halyqaralyq standarttarǵa sáikes keletin otyn shyǵarylady. Modernizatsiiadan keiin biz K-4, K-5 ekologiialyq sanattaryndaǵy janarmaidy satamyz. Aiyna keminde bir ret búkil Qazaqstan boiynsha janar-jaǵarmai stantsiialary tekseriledi. Bul shamamen - 350 janarmai beketi. Buzýshylyqtar is júzinde kóp anyqtalmaidy. Munai ónimderiniń ózi totyǵýǵa beiim bolǵandyqtan, eger qandai da bir olqylyq anyqtalsa, bizde ol ónimdi qalpyna keltirý normasy bar. Ony dereý satýdy toqtata turyp, tekserip, qajet bolǵan jaǵdaida ónimdi qalpyna keltiremiz. Tek qalpyna keltirilip, sapa sáikestigi zerthanalyq tekserýden ótkennen keiin, biz ony satýǵa ruqsat beremiz», - deidi Aqylbek Sýhanberdiev.
Ol sondai-aq, otandyq benzinniń reseilik ónimnen esh kemshiligi joq ekenin aitady.
«Maman retinde aitarym, barlyq zaýytymyz halyqaralyq standarttarǵa sáikes otyn shyǵarady. Barlyq reseilik jáne qazaqstandyq zaýyttar túptep kelgende otyndy eýropalyq standarttarǵa sáikes óndiredi. Qazaqstannyń janar-jaǵarmai quiý beketterinde satylatyn otynnyń reseilik ónimnen esh aiyrmashylyǵy joq. Dál sol reseilikterdiń ózi bizdiń shekaradaǵy aýdandarǵa kelip, arzanǵa benzin satyp alyp ketip jatyr», - dedi ol.
