Memleket basshysy Qasym-Jomart Toqaevtyń Jarlyǵymen Qazaqstanda Strategiialyq josparlaý jáne reformalar agenttigi, sondai-aq Básekelestikti qorǵaý jáne damytý agenttigi quryldy, dep habarlaidy "Ult aqparat" Aqordaǵa silteme jasap.
Qazaqstan Respýblikasynyń memlekettik basqarý júiesin odan ári jetildirý jónindegi sharalar týraly
Qazaqstan Respýblikasy Konstitýtsiiasynyń 44-babynyń 5) tarmaqshasyna sáikes memlekettik basqarý júiesin jańǵyrtý jáne onyń tiimdiligin arttyrý maqsatynda QAÝLY ETEMIN:
1. Mynalar:
1) Qazaqstan Respýblikasynyń Strategiialyq josparlaý jáne reformalar agenttigi qurylsyn, oǵan strategiialyq josparlaý jáne memlekettik statistikalyq qyzmet salalaryndaǵy Qazaqstan Respýblikasy Ulttyq ekonomika ministrliginiń fýnktsiialary men ókilettikteri berile otyryp, mynadai:
reformalardy júzege asyrý tásilderin, reformalardy júzege asyrýǵa qajetti, sondai-aq olardyń iske asyrylý barysyn monitoringteý men baǵalaý boiynsha normativtik quqyqtyq aktiler jobalaryn ázirleý;
memlekettik josparlaý júiesiniń qujattaryn daiyndaý kezinde, sondai-aq olardy kelisý, iske asyrý barysyn monitoringteý men baǵalaý boiynsha memlekettik organdardyń jáne kvazimemlekettik sektor sýbektileriniń qyzmetin úilestirý;
memlekettik organdardyń memlekettik basqarý júiesin jetildirýge baǵyttalǵan usynystaryn kelisý;
eldiń damýy men halyqaralyq ahýaldy strategiialyq boljamdaý men taldaý júrgizý;
vedomstvolyq statistika salasyndaǵy jumysty úilestirý;
ortalyq memlekettik organdar jáne oblystardyń, respýblikalyq mańyzy bar qalalardyń, astananyń jergilikti atqarýshy organdary qyzmetiniń tiimdiligine jyl saiynǵy baǵalaý júrgizý boiynsha jumystardy úilestirý jónindegi fýnktsiialar men ókilettikter berilsin;
2) Qazaqstan Respýblikasynyń Básekelestikti qorǵaý jáne damytý agenttigi qurylsyn, oǵan tiisti taýar naryqtarynda básekelestikti qorǵaý jáne monopolistik qyzmetti shekteý, memlekettik monopoliia salasyna jatqyzylǵan qyzmetti baqylaý men retteý salasyndaǵy Qazaqstan Respýblikasy Ulttyq ekonomika ministrliginiń fýnktsiialary men ókilettikteri berilsin.
2. Qazaqstan Respýblikasynyń Úkimeti:
1) Qazaqstan Respýblikasy Prezidentiniń Ákimshiligimen kelisý boiynsha memlekettik organdar men olarǵa vedomstvolyq baǵynysty uiymdardyń shtat sanyn qaita bólýdi;
2) Qazaqstan Respýblikasy Ulttyq ekonomika ministrliginiń Statistika komitetin tiisti shtat sanymen birge Qazaqstan Respýblikasynyń Strategiialyq josparlaý jáne reformalar agenttiginiń qaraýyna berip, ony keiinnen Ulttyq statistika biýrosy etip qaita qurýdy;
3) osy Jarlyqty iske asyrý boiynsha ózge de sharalardy qabyldaýdy qamtamasyz etsin.
3. Qazaqstan Respýblikasynyń Strategiialyq josparlaý jáne reformalar agenttigi men Qazaqstan Respýblikasynyń Básekelestikti qorǵaý jáne damytý agenttigi beriletin fýnktsiialar men ókilettikter sheginde Qazaqstan Respýblikasy Ulttyq ekonomika ministrliginiń quqyqtary men mindettemeleriniń quqyqtyq mirasqorlary bolyp aiqyndalsyn.
4. «Qazaqstan Respýblikasy Prezidentiniń Ákimshiligi týraly erejeni bekitý týraly» Qazaqstan Respýblikasy Prezidentiniń 2008 jylǵy
11 naýryzdaǵy № 552 Jarlyǵyna (Qazaqstan Respýblikasynyń PÚAJ-y, 2008 j., № 12-13, 116-qujat) mynadai tolyqtyrý engizilsin:
joǵaryda atalǵan Jarlyqpen bekitilgen Qazaqstan Respýblikasynyń Prezidentine tikelei baǵynatyn jáne esep beretin memlekettik organdardyń tizbesi:
mynadai mazmundaǵy joldarmen tolyqtyrylsyn:
«Qazaqstan Respýblikasynyń Strategiialyq josparlaý jáne reformalar agenttigi»;
«Qazaqstan Respýblikasynyń Básekelestikti qorǵaý jáne damytý agenttigi».
5. Qazaqstan Respýblikasy Prezidentiniń Ákimshiligi bir ai merzimde:
1) Qazaqstan Respýblikasy Prezidentiniń qaraýyna:
qurylǵan Qazaqstan Respýblikasynyń Strategiialyq josparlaý jáne reformalar men Qazaqstan Respýblikasynyń Básekelestikti qorǵaý jáne damytý agenttikteriniń tóraǵalarymen birlesip, qurylǵan agenttikter men olardyń qurylymdary týraly erejelerdiń jobalaryn;
Qazaqstan Respýblikasynyń Úkimetimen birlesip, qaita uiymdastyrylatyn memlekettik organdardan shtat sanyn qurylǵan agenttikterge qaita bólý, sondai-aq olardyń qyzmetkerleriniń eńbegine aqy tóleý júiesi jóninde usynystar engizsin;
2) osy Jarlyqty iske asyrý boiynsha ózge de sharalardy qabyldasyn.
6. Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júktelsin.
7. Osy Jarlyq qol qoiylǵan kúninen bastap qoldanysqa engiziledi.
Qazaqstan Respýblikasynyń
Prezidenti Q.Toqaev
Nur-Sultan, Aqorda, 2020 jylǵy 8 qyrkúiek
№ 407
Eske salaiyq, Memleket basshysy Q.Toqaev atalmysh eki agenttikti qurý týraly tapsyrmany el halqyna biylǵy Joldaýynda júktegen bolatyn.
«Prezidentke tikelei qarasty Básekelestikti qorǵaý jáne damytý jónindegi agenttik qurýdy tapsyramyn. Teń básekelestikti damytýda ekonomikany memleket ieliginen shyǵarý mańyzdy ról atqarady. Ortalyq memlekettik organdardyń, ákimdikter men holdingterdiń menshiginde 7 myńǵa jýyq ulttyq nysan bar. Biraq «Memlekettiń sharýany jaqsy júrgize almaityny» aksiomaǵa ainalǵan tárizdi», - degen edi Prezident.
Sondai-aq Joldaýdy jariialaý barysynda Q.Toqaev indet pen daǵdarys jaǵdaiynda memlekettik basqarýdyń qazirgi júiesi barynsha qarqyndy jumys istep jatqanyna toqtalyp: «Shuǵyl mindetterdi sheshý ýaqyt pen resýrstardy qajet etedi. Alaida, aldaǵy keńistikti nazardan tys qaldyrmaý kerek. Sondyqtan Prezidentke tikelei baǵynatyn Strategiialyq josparlaý jáne reformalar jónindegi agenttik qurý týraly sheshimdi qabyldadym», - dedi.
