Qazaqstanda qosylǵan qun salyǵy boiynsha jańa salyq jeńildikteri qoldanysqa enedi. Bul týraly QR QM Memlekettik kirister komitetinen málim etti, dep habarlaidy "Ult aqparat".
«Salyq jáne biýdjetke tólenetin basqa da mindetti tólemder týraly» Qazaqstan Respýblikasynyń Kodeksine (Salyq kodeksi) engizilgen tolyqtyrýlar men ózgetýlerge sáikes, qosylǵan qun salyǵy (QQS) boiynsha jańa salyq jeńildikteri qoldanysqa enedi«, - delingen komitet aqparatynda.
Sonymen jańa normalarǵa sáikes, ótkizý orny Qazaqstan Respýblikasy bolyp tabylatyn mynadai taýarlardy, jumystardy, kórsetiletin qyzmetterdi ótkizý boiynsha ainalymdar QQS-tan bosatylady:
1) bir mezgilde mynadai sharttar saqtalǵan kezde:
- arnaiy ekonomikalyq aimaqtarynyń aýmaǵynda qyzmetin júzege asyratyn uiymdarmen taýarlardy berýge arnalǵan shart (kelisimshart) bolsa;
- arnaiy ekonomikalyq aimaqqa qatysýshyǵa taýarlardyń tiep-jóneltilgenin rastaityn qujattar bolsa;
- arnaiy ekonomikalyq aimaqqa qatysýshy – satyp alýshynyń taýarlardy alǵanyn rastaityn qujattar bolsa, arnaiy ekonomikalyq aimaqtardyń aýmaǵynda basym qyzmet túrlerin júzege asyrý kezinde óndiriletin jáne ótkiziletin taýarlardy;
2) Dúniejúzilik poshta odaǵyna múshe basqa elderdiń taǵaiyndalǵan operatorlarynyń halyqaralyq poshta jóneltilimderin Qazaqstan Respýblikasynyń aýmaǵy arqyly tranzitteý boiynsha taǵaiyndalǵan operatordyń Dúniejúzilik poshta odaǵynyń aktilerine sáikes biryńǵai qujattarmen resimdelgen kórsetiletin qyzmetterin ótkizý boiynsha ainalymdar;
3) qalalyq (aýyldyq), qala mańyndaǵy, aýdanishilik, aýdanaralyq (oblysishilik qalaaralyq) qatynasta avtomobil kóligimen, sondai-aq tramvailarmen jolaýshylardyń áleýmettik mańyzy bar tasymaldaryn júzege asyrý jónindegi kórsetiletin qyzmetterdi ótkizý boiynsha ainalymdar qosylǵan qun salyǵynan bosatylady.
Atalǵan tolyqtyrýlar Salyq kodeksiniń 394-babyna engizilgen.
Qoldanystaǵy Salyq kodeksimen ýákiletti ekonomikalyq operatorlarmen (ÝEO) belgilengen sharttardy saqtaǵan jaǵdaida importqa salynatyn QQS-ty tóleý merzimin uzartý qarastyrylǵan.
Salyq kodeksiniń 399-babyna engizilgen ózgeristerge sáikes, kodekstiń 49-babynyń 10-tarmaǵyna sáikes janama salyqtardy tóleý merzimi ózgertilgen jáne 457-babynda belgilengen talaptar oryndalǵan taýarlardyń importy QQS-tan bosatylady.
Taýarlardyń importy kezinde QQS-tan bosatýdy qoldaný tártibi men sharttaryn ýákiletti organ bekitedi.
Taýarlardyń eksportyn rastaý tártibi buzylǵan jaǵdaida importtalatyn taýarlarǵa QQS EAEO keden zańnamasynda nemese Qazaqstan Respýblikasynyń keden zańnamasynda aiqyndalǵan tártippen jáne mólsherde importtalatyn taýarlarǵa QQS tóleý úshin belgilengen merzimnen bastap ósimpul esepke jazyla otyryp tóleýge jatady.
Osylaisha, zańmen QQS-ty tóleý merzimin uzartylǵan QQS tóleýshileriniń belgilengen sanattary úshin EAEO múshe elderge budan buryn importtalǵan taýarlardy shyǵarǵan jaǵdaida QQS-nan bosatýdy kózdeitin túzetý engizilgen.
Salyq kodeksiniń 411-babyna engizilgen tolyqtyrýlarǵa sáikes, QQS qosymsha somasyn esepke jatqyzýǵa quqyly qyzmet túrlerine mynalar qosyldy:
- maqta-mata talshyǵyn, maqta talshyǵyn daiyndaý;
- ashytqy óndirý;
- salyq tóleýshi agroónerkásiptik keshendi damytý salasyndaǵy ýákiletti organ aiqyndaǵan tártippen kelisim jasasqan jaǵdaida, uzaq saqtalatyn shokolad, qantty konditerlik ónimder, pechene jáne unnan jasalǵan konditerlik ónimder óndirý;
- qant qyzylshasynan qant óndirý.
Engizilgen ózgerister otandyq taýar óndirýshilerdi qoldaýǵa baǵyttalǵan.
