Elimizde jalpyǵa birdei deklaratsiia tapsyrý kezeń-kezeńmen engiziledi, dep habarlaidy "Ult aqparat" Memlekettik kirister komitetine silteme jasap.
Vedomstvonyń baspasóz qyzmetiniń málimetinshe, biyl 3 shildede jalpyǵa birdei deklaratsiialaýdy engizýdi 2020 jylǵy 1 qańtardan 2021 jylǵy 1 qańtarǵa aýystyrýdy jáne budan ári kezeń-kezeńimen kóshýdi kózdeitin «Qazaqstan Respýblikasynyń keibir zańnamalyq aktilerine qarjy naryǵyn retteý men damytý jáne mikroqarjylyq qyzmet máseleleri boiynsha ózgerister men tolyqtyrýlar engizý týraly» (№262-VI QRZ) Qazaqstan Respýblikasynyń Zańy qabyldandy.
«Birinshi kezeńde – 2021 jylǵy 1 qańtardan bastap jalpyǵa birdei deklaratsialaý sheńberindegi deklaratsiiany: jaýapty memlekettik laýazymdaǵy adamdar men olardyń jubaiy (zaiyby);
memlekettik fýnktsiialardy oryndaýǵa ýákilettik berilgen adamdar men olardyń jubaiy (zaiyby); memlekettik fýnktsiialardy oryndaýǵa ýákilettik berilgen adamdarǵa teńestirilgen adamdar men olardyń jubaiy (zaiyby);
«Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq Zańyna jáne «Sybailas jemqorlyqqa qarsy is-qimyl týraly», «Qazaqstan Respýblikasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar rynogy týraly» Qazaqstan Respýblikasynyń zańdaryna sáikes deklaratsiia usyný jónindegi mindet júktelgen adamdar bolyp tabylatyn jeke tulǵalar tapsyrady», delingen habarlamada.
Ekinshi kezeńde – 2023 jylǵy 1 qańtardan bastap memlekettik mekemelerdiń jumyskerleri men olardyń jubaiy (zaiyby), sondai-aq kvazimemlekettik sektor sýbektileriniń jumyskerleri men olardyń jubaiy bolyp tabylatyn jeke tulǵalar tapsyrady.
«Úshinshi kezeńde – 2024 jylǵy 1 qańtardan bastap zańdy tulǵalardyń basshylary men quryltaishylary jáne olardyń jubaiy, dara kásipkerler jáne olardyń jubaiy tapsyrady.
Tórtinshi kezeńde – 2025 jylǵy 1 qańtardan bastap azamattardyń qalǵan sanattary deklaratsiia tapsyrady», delingen habarlamada.
