Qazaqstanda «jalǵyzbasty ana» túsinigi engizilmeidi. Bul týraly QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov aitty, dep habarlaidy "Ult aqparat".
«Jalǵysbasty ana» dep zańnamalyq aiqyndaý, áleýmettik qorǵaý jáne ózge áleýmettik igilik usynýdy jaqtamaimyz. Óz deńgeiimde mundaidy qoldamaityndyǵymyzdy aita alamyn. Túptep kelgende biz óziniń mádenietin, otbasylyq qundylyqtaryn, otbasylyq qarym-qatynasyn, bala tolyqqanda ósýi úshin ákeniń de, ananyń da tálim-tárbiesin nasihattaityn elmiz. Balanyń nekeden tys nemese basqa da jaǵdaida dúniege kelýin yntalandyrmaýymyz qajet. Mine dál osyǵan orai Qazaqstanda «jalǵyzbasty ana» qarastyrylmaityndyǵyn óz deńgeiimde aita alamyn», - dedi ol Ortalyq kommýnikatsiialar qyzmetindegi brifing barysynda BAQ ókilderiniń saýalyna orai.
Degenmen, departament basshysy Qazaqstannyń Eńbek kodeksinde «balany jalǵyz tárbieleitin ana», «tolyq emes otbasy» degen túsinikterdiń bar ekendigine nazar aýdartty.
«Bul atalǵan analardyń, ásirese jumys isteitin analardyń jumys berýshiler tarapynan qorǵalýy úshin, olardy zańsyz jumystan shyǵaryp jibermeýi úshin jasalǵan. Qajettilik týyndaǵan jaǵdaida ikemdi jumys kestesine aýysý múmkindigi nemese qysqartylǵan jumys kestesimen eńbek etýi kózdelgen. Budan bólek «tolyq emes otbasy» degen túsinik bar. Neke jáne otbasy týraly kodekske sáikes, jalǵyzbasty analarmen qatar balasyn jalǵyz tárbielep otyrǵan ákeler de bar. Olar da tolyq emes otbasyǵa jatady. Onda ajyrasýdan bólek, ómirdegi túrli jaǵdailarǵa bailanysty jubaiy ómirden ozyp, balasymen qalǵan erler de kezdesedi. Biraq, áleýmettik qorǵaý úshin «jalǵyzbasty ana» túsinigi qarastyrylmaidy», - dedi Asqar Niiazov.
