Jyl basynan beri qazaqstandyqtarǵa 1,8 trln teńgeden astam somaǵa zeinetaqy tólendi. Bul týraly QR Eńbek jáne halyqty áleýmettik qorǵaý ministrliginen málim etti, dep habarlaidy "Ult aqparat".
«2020 jylǵy qańtar-qyrkúiek ailarynda respýblikalyq biýdjetten bazalyq zeinetaqy tóleýge 576,4 mlrd teńge, yntymaqty zeinetaqy tólemderine – 1 trln 285,4 mlrd teńge baǵyttaldy», - dedi ministrlikten.
Biylǵy 1 qazandaǵy jaǵdai boiynsha Qazaqstanda zeinetkerler sany 2 mln 212 myń adamdy quraidy.
Zeinetaqynyń ortasha mólsheri (onyń ishinde bazalyq zeinetaqy) 94 913 teńgeni quraidy.
Eske salaiyq, 2018 jylǵy 1 shildeden bastap memlekettik bazalyq zeinetaqy tólemi, onyń zeinetaqy júiesindegi tájiribesin eskere otyryp, ár alýshyǵa jeke taǵaiyndalady.
Bul rette, 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder zeinetaqy júiesindegi eńbek ótiline qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54% quraidy. Sodan keiin 10 jyldan asqan ár jyl úshin onyń mólsheri 2% artady. Mysaly, eger siz 20 jyl qatyssańyz, bazalyq zeinetaqy kúnkóris deńgeii qunynyń 74%, 30 jyl – kúnkóris qunynyń 94% quraidy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.
Eger bir ai ishinde MZJ birneshe ret Biryńǵai jinaqtaýshy zeinetaqy qoryna jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde, jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
